एजेन्सी – इटालियन सिरी ‘ए’ मा एटलान्टाले सानदार जित दर्ता गरेको छ । एटलान्टाले साम्पडोरियालाई ४–० को भारी अन्तरले पराजित गरेको हो ।

घरेलु मैदानमा एटलान्टाको फराकिलो जितमा टिउन कुपमाइनर्सले दुई तथा मारियो पासालिस र एलेक्से मिरानचुकले समान एक गोल गरे । पहिलो र दोस्रो हाफमा समान दुइ गोल निस्किएको थियो ।

जिविस स्टेडियम बरगामोमा सोमबार राति भएको खेलको छैटौं मिनेटमा मारियो पासालिसको गोलबाट घरेलु टोलीले सुरुवाती अग्रता लिएको थियो । उनले रेमो फ्रेउलेरको पासमा हेडमार्फत गोल गर्न सफल भएका थिए । २९औं मिनेटमा टिउन कुपमाइनर्सले गोल गर्दै एटलान्टालाई पहिलो हाफमा २–० को अग्रता दिलाए । उनले माटियो पेसिनाको पासलाई सदुपयोग गरेका थिए ।

६१औं मिनेटमा टिउन कुपमाइनर्सले व्यक्तिगत दोस्रो तथा टोलीका लागि तेस्रो गोल गर्दै एटलान्टालाई सहज जिततर्फ अघि बढाए । उनले एलेक्से मिरानचुकको पासलाई सदुपयोग गरेका थिए । एक असिस्ट दिइसकेका एलेक्से मिरानचुकले ८६औं मिनेटमा रेमो फ्रेउलेरको पासमा गोल गर्दै एटलान्टाको फराकिलो जित पक्का गरे ।

यो जितसँगै एटलान्टाले शीर्ष चारमा बलियो दावेदारी प्रस्तुत गरेको छ । एटलान्टा २६ खेलबाट ४७ अंक जोडेर पाँचौ स्थानमा यथावत रहेको छ । एटलान्टा एक खेल बढी खेलेको युभेन्ट्सभन्दा ३ अंकले पछि छ । पराजित साम्पडोरिया २६ अंक जोडेर १५औं स्थानमा रहेको छ ।