एजेन्सी – मासन माउन्ट र काई हाभर्टजले समान एक गोलसँगै अर्काे असिस्ट दिएपछि लन्डन क्लब चेल्सीले इंग्लिस प्रिमियर लिगमा सहज जित हात पारेको छ ।

चेल्सीले नर्विच सिटीमाथि उसकै मैदानमा ३–१ को सहज जित आत्मसात गरेको हो । चेल्सीको जितमा ट्रिभोअ चलोवाह, मासन माउन्ट र काई हाभर्टजले गोल गरे । घरेलु टोलीका टिमु पुकीले एक गोल फर्काए ।

क्यारो रोड नर्विचमा बिहीबार राति भएको खेलको तेस्रो मिनेटमा नै ट्रिभोअ चलोवाहको गोलबाट चेल्सीले सुरुवाती अग्रता लिएको थियो । उनले मासन माउन्टको कर्नरमा हेडरमार्फत गोल गरेका थिए । १४औं मिनेटमा मासन माउन्टले गोल गर्दै चेल्सीलाई पहिलो हाफमा २–० को अग्रता दिलाए । उनले काई हाभर्टजको पासमा गोल गर्न सफल भएका थिए ।

६९औं मिनेटमा टिमु पुकीले पेनाल्टीमार्फत गोल गर्दै घरेलु टोलीलाई खेलमा फर्काउने संकेत दिए । पेनाल्टी बक्समा ट्रिभोअ चलोवाहले हातले बल छुन पुगेपछि रेफ्रीको भिएआरको सहायता लिदै नर्विचलाई पेनाल्टी प्रदान गरेको थियो । जसमा टिमु पुकी चुकेनन् । तर, इन्ज्युरी समयमा काई हाभर्टजले एङ्गोलो कान्टेको पासमा गोल गर्दै चेल्सीको जित पक्का गरे ।

यो जितसँगै चेल्सीले दोस्रो स्थानको लिभरपुलसँगको अंक दुरी छोट्याउँदै तेस्रो स्थानलाई थप मजवुत बनाएको छ । चेल्सीको २७ खेलबाट ५६ अंक पुगेको छ । लिभरपुलको ६३ तथा दुई खेल कम खेलेको आर्सनलको ४८ अंक छ । पराजित नर्विच १७ अंक जोडेर पुछारमा रहँदा रेलिगेसन दवाव बढेको छ ।

प्रिमियर लिगकै अर्काे खेलमा वल्भ्सले वाट्फोर्डलाई ४–०, न्युक्यासलले साउथ ह्याम्टनलाई २–१ ले तथा एस्टन भिल्लाले लिड्स युनाइटेडलाई ३–० को पराजित गरेको छ ।