काठमाडौं (हाम्रो खेलकुद) – घरेलु फुटबलका दुई ठूला क्लबबीच आज सुनसरीको दुहबीमा मनमोहन स्मृति दुहबी गोल्ड कप फुटबल प्रतियोगिताको उपाधिका लागि भिडन्त हुँदैछ । ए डिभिजन टोली लक्ष्मी हुन्डाई मनाङ मस्र्याङ्दी र त्रिभुवन आर्मी क्लबले ३ लाख रुपैयाँ पुरस्कार राशी रहेको गोल्डकपमा एकअर्कोको सामना गर्दैछन् । दुवै फाइनल जित्नेमा उत्तिकै आशावादी पनि छन् ।

पूर्व क्लबविरुद्ध विशेष कुनै रणनीति नभएको आर्मीका प्रशिक्षक नवीन न्यौपाने बताउँछन् । ‘हामीले अहिले सम्म जसरी खेलेका छौं । फाइनलमा पनि त्यसरी नै खेल्ने हो’ उनले भने, ‘मनाङ बलियो टोली हो त्यसमा शंका छैन । तर उपाधि जित्ने सम्भावना बराबरी छ । ’उता मनाङका प्रशिक्षक हेमन्त आलेमगरले फरक रणनीतिमा उत्रने बताए पनि त्यसमा खुलेर कुरा गरेनन् । ‘खेल हेरेर रणनीति बनाउछौं ’उनले भने ‘हामीले जित्ने सम्भावना बढी छ ।’

आर्मीको सेमिफाइनल केही सहज रहेपनि बाँकी खेलमा दुवै टोलीले संघर्ष गर्दै फाइनलको यात्रा तय गरेका हुन् । मनाङले सेमिफाइनलमा रमपम झापा ११ लाई र त्यसअघि आयोजक एलेभन एरोजलाई समान २–१ ले हराएको थियो । सेमिफाइनलमा भुटानको बिआरसीलाई ५–२ ले हराएको आर्मीले पहिलो खेलमा काठमाडौंको चर्च ब्वाईज युनाइटेडलाई २–१ ले नै हराएको थियो । केही विदेशी खेलाडी रहेको मनाङमा थप आकर्षणका रुपमा राष्ट्रिय टोलीका युवा स्ट्राइकर विमल घर्तीमगर छन् । राष्ट्रिय टोलीका अनिल गुरुङ र विराज महर्जन त पहिलोबाट छदैछन् । अर्कोतिर आर्मीका राष्ट्रिय टोली दुई स्ट्राइकर भरत खवास र नवयुग श्रेष्ठले मोर्चा सम्हाल्नेछन् । गोलकिपर विकेश कुथु रहनु आर्मीका लागि अर्को फाइदाजनक पाटो हो ।

मनमोहन प्रतिष्ठान र एलेभन एरोजले संयुक्त रुपमा आयोजना गरेको प्रतियोगिताको विजेताले ३ लाख १ हजार १ सय ११ र दोस्रो हुने टोलीले १ लाख ५० हजार रुपैयाँ प्राप्त गर्नेछन् ।