काठमाडौं (हाम्रो खेलकुद)– राष्ट्रिय महिला फुटबल टोली तथा एपिएफकी फरवार्ड सावित्रा भण्डारी १३ महिनापछि फुटबलमा पूनरागमन गर्दैछिन् । गत वर्ष राष्ट्रिय महिला लिग खेल्ने क्रममा घुँडामा गम्भिर चोट लागेपछि सावित्राको घुँडाको शल्यक्रिया भएको थियो ।

शल्यक्रियापछिको रिह्याब सकेर सावित्रा झण्डै डेढ महिना अघि स्वदेश फर्केकी थिइन् । त्यसयता उनी लगातार एपिएफको प्रशिक्षणमा सामेल भइरहेकी छिन् । चितवनमा बिहीबार सुरु हुने राष्ट्रिय लिगमार्फतनै सावित्राले पूनरागमन गर्न लागेकी हुन् । एपिएफ र त्रिभुवन आर्मी क्लबबीच उद्घाटन खेल हुँदैछ । एपिएफका प्रशिक्षक जनक सिंहले सावित्राले पूनरागमन गर्ने निश्चत रहेको बताए ।

‘सावित्राले भोलीको खेल खेल्निछन् । सुरुमा खेलाउँछौं वा पछि त्यो खेलको अवस्था हेरेर गर्छौ,’ उनले भने,‘ खेल्ने भने निश्चित छ ।’ सिंहका अनुसार सावित्राको प्रशिक्षणलाई हेर्दा उनी पूर्ण रुपमा फिट र पुरा ९० मिनेट नै खेल्न सक्ने देखिएपछि कतारका फिजियोथेरापिष्ट र टोलीको फिजियोथेराष्टिको सुझाव अनुसार विस्तारै खेल्ने समय बढाउनँदै लाने बताएका छन् ।

‘पहिलो, दोस्रो वा त्यसपछि कति समय खेलाउने भन्ने हामीलाई तालिका नै उपलब्ध गराइएको छ,’ उनले भने,‘त्यसकै आधारमा यहाँ टोलीको फिजियोथेरापिष्टले दिने सल्लाहका आधारमा हामी सावित्रालाई खेलाउँछौं ।’ ७ महिना लामो उपचारपछि सावित्रा माघ २५ गते स्वदेश फर्केकी थिइन् । उपचारका लागि उनी असार १२ गते कतार गएकी थिइन् । सावित्राको असार ३१ गते कतारको दोहामा रहेको अस्पेटार अस्पतालमा दायाँ घुँडाको शल्यक्रिया भएको थियो ।

राष्ट्रिय लिग खेल्ने क्रममा गत वर्ष फागुन ३ गते उनको घुँडामा चोट लागेको थियो । झन्डै ८ वर्षे खेल जीवनमा सावित्राले पहिलो पटक गम्भिर खालको चोटबाट गुज्रनु परेको थियो । सावित्राको नाममा राष्ट्रिय फुटबल टोलीबाट सर्वाधिक ३८ गोलको कीर्तिमान छ । सावित्रा नेपालको मात्र नभई दक्षिण एसियाकै उत्कृष्ट फरवार्डमा परिचित छिन् ।

नेपाली फुटबलमा एपिएफले वर्चस्व जमाउँदा उनले इन्डियन लिग (आई लिग) दुई फरक क्लबबाट खेलेकी छिन् । दुवैपटक उनी खेलेको टोली आइ लिग च्याम्पियन बनेको थियो । गत वर्ष गोकुलमलाई च्याम्पियन बनाउन महत्वपूर्ण भूमिका निर्वाह गरेकी उनी आइ लिगको सर्वाधिक गोलकर्ता पनि बनेकी थिइन् ।

नेपाल खेलकुद पत्रकार मञ्चले मंगलबार आयोजना गरेको पल्सर स्पोर्टस अवार्डमा सावित्रा दशककी उत्कृष्ट महिला खेलाडी अवार्डबाट सम्मानित भएकी थिइन् । अवार्ड सकिएलगत्तै उनी टोलीमा सामेल हुन चितवन गएकी थिइन् । एक वर्ष भन्दा लामो समयपछि मैदानमा फर्कन लाग्दा उत्साहसँगै डर र दबाब पनि रहेको सावित्राले बताइन् ।

‘गम्भिर चोटपछि मनोबल कहिल कमजोर हुने रहेछ । पहिला जस्तो खेल्न सक्छु कि सक्दिन भन्ने दबाब पनि छ, उनले भनिन्,‘ अलि अलि दुखाई अझै छ । पुरानै लयमा फर्कनेका लागि मनोबल उच्च बनाउन जरुरी छ । त्यहि योजनाका साथ खेल्नेछु ।’ कतारका अस्पेटारका फिजियोले आफूलाई पहिलो खेलमा ३०, दोस्रो खेलमा ४५, तेस्रोमा ६० र चौथोबाट पूरा समय खेल्न मिल्ने सल्लाह दिएको सात्रिाले जानकारी दिइन् ।