मड्रिड (एजेन्सी)– अन्तिम मिनेटमा बार्सिलोना सम्हालिन नसकेपछि सिजनको पहिलो ‘एल क्लासिको’ बराबरीमा टुंगिएको छ । स्पेनिस ला लिगको सिजनको पहिलो बहुप्रतिक्षित खेलमा रियल मड्रिड र बार्सिलोनाले १–१ को बराबरी खेलेको छन् ।
अन्तिम मिनेटमा सर्जियो रामोसले हेडमार्फत बराबरी गोल फर्काएपछि बार्सिलोना स्पष्ट ३ अंक लिनबाट असफल भएको छ । लुका मोड्रिचको फ्रिकिकमा रामोसले हेडमार्फत उत्कृष्ट गोल गरे ।
दोस्रो हाफमा बार्सिलोनाका लुइस स्वारेजले गरेको गोल नै रियलमाथि अग्रता लिएको थियो । ५३ औं मिनेटमा नेयमारको फ्रिकिकमा स्वारेजले हेड गोल गरेका थिए । ला लिगामा बार्सिलोनाका यो लगातार तेस्रो बराबरी हो । उता रियलले आफ्नो अपराजित यात्रालाई कायम राखेको छ । शनिबारको नजितासहित सबै खाले प्रतिस्पर्धामा गरि रियलको अपराजित यात्रा ३३ खेल पुगेको छ ।
पछिल्ला दुई खेलमा बाराबरी खेलेको बार्सिलोना घरेलु मैदानमा खेल्दा पनि दबाबमा थियो । बराबरीपछि शीर्षस्थानको रियल र दोस्रो स्थानको बार्सिलोनाबीच ६ अंकको दुरी यथावत रहेको छ । १४ खेलको समाप्तीमा रियलको ३४ र बार्सिलोनाको २८ अंक छ । दोस्रो हाफमा नेयमारले गोलअन्तरलाई दोब्बर पार्ने अवसर पाएका थिए । तर उनको प्रहार पोस्टको थोरैमाथिबाट बाहिरियो । आन्द्रे इनियस्टा र लियोनल मेसीले पनि गोलको मौका पाए, तर मौकाको उपयोग गर्न सकेनन् । त्यसअघि रियलले पनि अग्रताको मौका पाएको थियो । तर क्रिस्टियानो रोनाल्डोको प्रहारलाई बार्सिलोनाका गोलकिपरले रोके । बराबरी गोलअघि पनि रोनाल्डो गोलको अर्को मौका पाए, तर सफल भएनन् । खेलको पहिलो हाफमा रियल र दोस्रो हाफमा बार्सिलोना खेलमा हावी भएको थियो ।
