एजेन्सी – टाइब्रेकरमा इजिप्टलाई हराउँदै सेनेगल कतारमा हुने फिफा विश्वकप २०२२ का लागि छनोट भएको छ । सेनेगलले इजिप्टलाई टाइब्रेकरमा ३–१ ले पराजित गर्दै अफ्रिका महादेशबाट विश्वकपमा स्थान पक्का गरेको हो ।

मंगलबार राति भएको छनोटको फाइनल चरणको प्ले अफको पहिलो लेगमा १–० ले पराजित भएको सेनेगलले दोस्रो लेगमा १–० को जित निकाल्दै छनोट हुने सम्भावना जीवित राखेको थियो ।

दोस्रो लेगमा अफ्रिकाको च्याम्पियन सेनेगलको जितमा बोउलाय डियाले खेलको तेस्रो मिनेटमा गरेको गोल नै निर्णायक बन्यो । त्यसपछि खेल अतिरिक्त समय हुदै पेनाल्टीमा लम्विएको थियो । रोमाञ्चक बनेको पेनाल्टीमा दुवै टोलीले सुरुवाती दुई प्रहारमा गोल गर्न सकेनन् ।

टाइब्रेकरमा इजिप्टका मोहमद सलाह, जिजो र मुस्तफा मोहमद चुक्दा विश्वकपमा स्थान बनाउनबाट असफल भएको हो । अमर अल सुलायले मात्रै गोल गर्न सफल भए । सेनेगलका इस्माइला सार, एहमाडोउ बाम्वा डिइङ र साडियो मानेले गोल गरे । कलिडोउ कोउलीवेली र सलिउ सिसले गोल गर्न सकेनन् ।

इजिप्ट र सेनेगलले यसै वर्ष अफ्रिका कप अफ नेसन्सको फाइनल खेल खेलेका थिए । जसमा सेनेगलले इजिप्टलाई टाइब्रेकरमा ४–२ ले पराजित गर्दै च्याम्पियन बनेको थियो ।

फिफा विश्वकप कतारका लागि अफ्रिका महादेशबाट सेनेगलसँगै घाना, क्यामरुन, मोरोक्को र ट्युनिसिया छनोट भएका छन् । घानाले नाइजेरियालाई अवे गोलमा पछि पार्दै विश्वकपमा स्थान बनाउन सफल भयो । यि दुई टोलीले पहिलो लेगमा गोलरहित बराबरी खेल्दा दोस्रो लेगमा १–१ गोलको बराबरी खेलेका थिए ।

क्यामरुनले अल्जेरियालाई अवे गोलमै पछि पार्दै विश्वकपमा स्थान बनाउन सफल भयो । पहिलो लेगमा अल्जेरियाले १–० का जित निकालेपनि दोस्रो लेगमा क्यामरुनले अतिरिक्त समयमा २–१ को जित तथा समग्रमा २–२ गोलबो बराबरी भएपनि अवे गोलमा अघि बढ्यो ।

मोरोक्कोले डिआर कंगोलाई समग्रमा ५–२ ले तथा ट्युनिसियाले मालीलाई समग्रमा १–० ले हराएर विश्वकपमा स्थान पक्का गरेको छ । यसपटक अफ्रिकाबाट बुर्किना फासो, आइभोरी कोस्ट, गावोन, दक्षिण अफ्रिका, नाइजेरिया र अल्जेरियाजस्ता बलियो टोली विश्वकपमा देखिने छैन ।