काठमाडौं (हाम्रो खेलकुद) – सहिद स्मारक ‘बी’ डिभिजन लिगको शीर्षस्थानमा रहेको चर्च ब्वाइज युनाइटेडले रानी पोखरी कर्नर टिम (आरसिटी) लाई पराजित गरेको छ । चर्च ब्वाइजले आरसिटीलाई २–० ले पराजित गरेको हो ।

सातदोबाटोस्थित एन्फा कम्प्लेक्सको खेल मैदानमा बुधबार भएको खेलमा चर्च ब्वाइजको जितमा कुवेर न्यौपाने र आशिष चापागाईले गोल गरे । दुवै गोल दोस्रो हाफमा भएको थियो । प्रतिस्पर्धात्मक खेलको ५२औं मिनेटमा कुवेर न्यौपानेको गोलबाट चर्च ब्वाइजले सुरुवाती अग्रता बनाएको थियो । ७५औं मिनेटमा आशिष चापागाईले गोल गर्दै चर्च ब्वाइजको जित पक्का गरे ।

यो जितसँगै चर्च ब्वाइजले शीर्षस्थानमा ४ अंकको स्पष्ट अग्रता बनाएको छ । चर्च ब्वाइजको १० खेलबाट २० अंक पुगेको छ । दोस्रो स्थानको बाँसबारीको १६ अंक छ । पराजित आरसिटीले शीर्षस्थानमा उक्लने मौका गुमाउँदा १० खेलबाट १५ अंक जोडेर तेस्रो स्थानमा झरेको छ ।

लिगकै अर्काे खेलमा मध्यपुर युथ एसोसिएसनले वीरगन्ज युनाइटेडलाई १–० ले पराजित गरेको छ । मध्यपुरको जितमा ८५औं मिनेटमा आशिक गुरुङले गरेको गोल नै निर्णायक बन्यो । यो जितसँगै मध्यपुर १० खेलबाट १३ अंक जोडेर आठौं स्थानमा रहेको छ । पराजित वीरगन्ज १० खेलबाट १० अंक जोडेर ११औं स्थानमा रहेको छ ।

लिगकै अर्काे खेलमा सामाजिक युवा क्लबलाई १–० ले पराजित गर्दै बाँसबारी क्लबले दोस्रो स्थानमा उक्लिएको छ । बाँसबारीको जितमा खेलको अन्त्यतिर सौरभ कार्कीले निर्णायक गोल गरे । उनले ८८औ मिनेटमा गोल गर्दै बाँसबारीलाई महत्वपुर्ण ३ अंक दिलाए ।

यो जितसँगै बाँसबारी १० खेलबाट १६ अंक जोडेर दोस्रो स्थानमा उक्लिएको छ । पराजित सामाजिक १० खेलबाट १० अंक जोडेर १२औं स्थानमा रहेको छ ।