काठमाडौं (हाम्रो खेलकुद) – शीर्षस्थानमा रहेको चर्च ब्वाइज युनाइटेड र रानी पोखरी कर्नर टिम (आरसिटी) ले सहिद स्मारक ‘बी’ डिभिजन लिगमा महत्वपूर्ण जित निकालेको छ ।

सातदोबाटोस्थित एन्फा कम्प्लेक्सको खेल मैदानमा शनिबार भएको खेलमा चर्च ब्वाइजले झम्सिखेल युथ क्लबमाथि १–० को झिनो महत्वपूर्ण जित निकालेको हो । चर्च ब्वाइजको जितमा पहिलो हाफमा आशिष चापागाईले गरेको गोल नै निर्णायक बन्यो । उनले खेलको २३औं गोल गरेका थिए ।

यो जितसँगै शीर्ष स्थानमा रहेको चर्च ब्वाइजले शीर्ष डिभिजनमा पुग्ने सम्भावना बलियो बनाएको छ । चर्च ब्वाइजको ११ खेलबाट २३ अंक पुगेको छ । लिग चरणको दुई खेल बाँकी रहँदा चर्च ब्वाइजले दोस्रो स्थानको टोलीलाई ५ अंकले पछि पारेको छ ।

अब चर्च ब्वाइजलाई शीर्ष डिभिजनमा उक्लन दुई मध्ये एक खेलमा जित हात पारे पर्याप्त बन्नेछ । चर्च ब्वाइजसँग हार बेहोरेको झम्सिखेल ११ खेलबाट ९ अंक जोडेर १३औं स्थानमा रहँदा रेलिगेसनको दवाव बढेको छ ।

लिगकै अर्काे खेलमा आरसिटीले बाँसबारी क्लबमाथि २–१ को महत्वपूर्ण जित निकालेको छ । आरसिटीको जितमा विश्वास थापमगर र कप्तान अमर डंगोलले गोल गरे । बाँसबारीका टंक प्रसाद गुरुङले एक गोल फर्काए ।

खेलको पाँचौ मिनेटमा विश्वास थापमगरको गोलबाट आरसिटीले अग्रता लिएको थियो । सातौं मिनेटमा टंकले गोल गर्दै खेललाई १–१ गोलको बराबरीमा ल्याए । ७५औं मिनेटमा कप्तान अमर डंगोलले गोल गर्दै आरसिटीको जित पक्का गरे ।

यो जितसँगै आरसिटीले शीर्ष डिभिजनमा उक्लने सम्भावना बलियो बनाएको छ । जितसँगै दोस्रो स्थानमा उक्लिएको आरसिटीले ११ खेलबाट १८ अंक जोड्दा बाँसबारीले दोस्रो स्थानमा उक्लने मौका गुमाएको छ । बासँबारी १६ अंक जोडेर चौथो स्थानमा रहेको छ ।

लिगकै अर्काे खेलमा वीरगन्ज युनाइटेडले श्री कुमारी क्लबलाई ३–१ ले पराजित गरेको छ । वीरगन्जको जितमा कृपाकान्त महतो थारुले दुई तथा सन्देश चौधरीले एक गोल गरे । श्री कुमारीका अरुज सिंहले एक गोल फर्काए ।

यो जितसँगै वीरगन्ज ११ खेलबाट १३ अंक जोडेर नवौं स्थानमा रहेको छ । श्री कुमारी १० खेलबाट १४ अंक जोडेर सातौं स्थानमा रहेको छ ।