चितवन (हाम्रो खेलकुद) – फरवार्ड सावित्रा भण्डारी ‘साम्वा’ र रश्मी कुमारी घिसिङको ह्याट्रिक सहयोगमा विभागीय टोलीद्धय नेपाल एपिएफ फुटबल क्लब र त्रिभुवन आर्मी फुटबल क्लबले राष्ट्रिय महिला लिगमा फराकिलो जित निकालेको छ ।

चितवनको भरतपुरमा शनिबार भएको खेलका एपिएफले चन्द्रपुर नगरपालिका रौतहतमाथि ८–१ को फराकिलो जित निकालेको हो । एपिएफको जितमा सावित्राले ह्याट्रिक पुरम गर्दा मन्जली कुमारी योन्जनले दुई तथा अनिता केसी, अनिता बस्नेत र अनु लामाले समान एक गोल गरिन् । चन्द्रपुरकी सुमित्रा सिंह पाख्रिनले एक गोल फर्काए ।

सावित्राले खेलको २३औं, ५०औं र ९०औं मिनेटमा गोल गर्दै ह्याट्रिक पुरा गरिन् । जारी महिला लिगमा उनको यो दोस्रो ह्याट्रिक हो । यसअघि उनले वालिङविरुद्ध ह्याट्रिकसहित चार गोल गरेकी थिइन् ।

चौथो मिनेटमा अनिता केसीको गोलबाट एपिएफले अग्रता लिएको थियो । १५ र ३१औं मिनेटमा मन्जलीले गोल गरिन् । अनिता बस्नेताले १६औं मिनेटमा तथा अनु लामाले ७१औं मिनेटमा गोल गरिन् । चन्द्रपुरकी सुमित्राले ८६औं मिनेटमा एक गोल फर्काइन् ।

यो जितसँगै अपराजित रहेको एपिएफ चार खेलबाट १२ अंक जोडेर शीर्षस्थानमा उक्लिएको छ । धनगढी उपमहानगरपालिकाले आर्मीसँग हार बेहोरेपछि एपिएफ शीर्षस्थानमा उक्लन सफल भयो । पराजित चन्द्रपुर १ अंक जोडेर सातौं स्थानमा रहेको छ ।

यस्तै आर्मीले धनगढीलाई लिगको पहिलो हार चखाउने क्रममा ६–० को फराकिलो जित निकालेको छ । आर्मीको जितमा रश्मी कुमारी घिसिङले ह्याट्रिक पुरा गर्दा विमला चौधरी, अमिसा कार्की र कुसुम खतिवडाले समान एक गोल थपिन् ।

जितसँगै आर्मी ४ खेलबाट ६ अंक जोडेर चौथो स्थानमा उक्लिएको छ । पराजित धनगडी ४ खेलबाटै ९ अंक जोडेर दोस्रो स्थानमा रहेको छ ।