सुबास हुमागाईं, काठमाडौं

सामाजिक क्लबका रुपमा २०६६ सालमा स्थापना भएको चर्च ब्वाइज युनाइटेड ‘बी’ डिभिजनको च्याम्पियन बन्दै ‘ए’ डिभिजन लिगमा बढुवा भएको छ । सी डिभिजन छनोट खेलेको २ वर्षमै चर्च ब्वाइज ए डिभिजन श्रेणीमा उक्लिएको हो ।

‘सी’ डिभिजनमा उक्लेकै सिजन बी डिभिजनमा बढुवा भएको चर्च ब्वाइजले यस सिजन उत्कृष्ट प्रदर्शन गर्दै २ खेल बाँकी रहँदै बढुवा पक्का गरेको हो । १२ औं खेलमा बाँसबारीमाथि फराकिलो जित दर्ता गरेपछि चर्च ब्वाइजले उपाधिसहित ‘ए’ डिभिजनको यात्रा तय गरेको हो । त्यसो त ‘सी’ डिभिजनमा उक्लन भने टोलीले ५ पटकको प्रयासपछि मात्र सफल भएको थियो । तीन पटक त टोली छनोटको सेमिफाइनलमा नै रोकिएको थियो ।

‘सी’ छनोट खेल्नुअघि नै टोलीले मोफसलको गोल्डकपमा भने आफ्नो पहिचान बनाइसकेको थियो । पूर्वमा हुने स्थानीय देखि राष्ट्रिय स्तरको गोल्डकपमा सहभागी भएका अधिकांशमा फाइनल पुग्ने चर्च ब्वाइजले आधा भन्दा बढीमा उपाधि जितेको छ । अध्यक्ष रुवेन राईका अनुसार मोफसलका ६० जति प्रतियोगिता खेल्दा झन्डै ३ दर्जन उपाधि टोलीले जितिसकेको छ ।

क्लबका संस्थापक अध्यक्ष समेत रहेका राई क्लबको स्थापनाकालदेखि नै टोलीमा आबद्ध छन् । उनी आफैं टोलीको व्यवस्थापन हेर्दै आएका छन् । हाल १६ सदस्यीय कार्यसमितिले वार्षिक शुल्क उठाएर क्लब संचालन गर्दै आएका छन् । यसबाहेक क्लबले स्वेच्छिक व्यक्तिगत अनुदान पनि लिने गरेको छ । पछिल्लो समय विभिन्न कर्पोरेट हाउसले पनि प्रायोजन गर्दै क्लबको आर्थिक अवस्था बलियो हुँदै गएको अध्यक्ष राई बताउँछन् ।

‘हामीले सुरुवातमा व्यक्तिगत सदस्यबाट शुल्क उठाएर संचालन गरेका हौं । मोफसलका प्रतियोगितामा पुरस्कार जितेको रकम पनि टोलीमा नै खर्चन थाल्यौं । डिभिजन लिग खेल्न थालेपछि प्रायोजन पनि पाउन थालेका छौं । अब ‘ए’ डिभिजन पुगेपछि केहि कर्पोरेट हाउसबाट सहयोग गर्ने भन्नुभएको छ,’ राईले सुनाए ।

क्लबले ‘ए’ डिभिजनसम्म यात्रा गर्दा ४ खेलाडी भने सी डिभिजन छनोटदेखि लगातार टोलीको साथमा रहे । कप्तान सनम राईसँगै डिफेन्डर अनोश मगर, मिडफिल्डर साइमन लिम्बु र फरवार्ड कुवेर न्यौपाने ‘सी’ डिभिजनमा छनोट गर्दादेखि नियमित टोलीमा छन् । यसपटक यी चारले नियमित खेल्दै क्लबको बढुवामा महत्त्वपूर्ण भूमिका निर्वाह गरे । यसबाहेक क्लबले ‘ए’ डिभिजन अनुभव बोकेका योगेश गुरुङ, विवेक पौडेल, विकास थुलुङ र अनिल धामीलाई क्लबमा अनुबन्ध गर्यो ।

यसै सिजन क्लबले अनुबन्ध गरेका आशिष चापागाईले पनि आक्रमणमा निर्णायक भूमिका खेले । उनले झापाको स्थानीय प्रतियोगिता र भारतको गोल्डकपमा गरेको प्रदर्शनबाट प्रभावित भएर अनुबन्ध गरेको राईले जानकारी दिए । राईले खेलाडी अनुबन्धमा क्लबलाई निरज बस्नेतले ठूलो सहयोग गरेको बताए ।

‘यो सामुहिक प्रयासले नै सफल भएको हो । निरज भाइ (बस्नेत) ले टोली बनाउन निकै मिहिनेत गरेका छन् । डिभिजनमा खेल्दा मात्र होइन मोफसलदेखि नै टोली निर्माणमा उनले महत्त्वपूर्ण भूमिका निर्वाह गरे,’ राईले सुनाए । मोफसलका प्रतियोगितामा निरज आफैंले पनि क्लबका लागि उपाधि जितेका छन् ।

संकटा क्लबबाट ‘ए’ डिभिजन लिग खेलेका निरज गत महिना न्युजिल्यान्ड प्रस्थान गरे । उनी क्लबको सुरुवाती खेलहरुमा मैदान नै पुगेर टोलीको समर्थन गरिरहेका थिए । न्युजिल्यान्ड पुगेपछि पनि उनी सामाजिक संजालमा क्लबबारे नै लेखिरहेका भेटिन्छन् ।

राईले क्लबको प्राविधिक पक्षमा विक्रम लामाको साथको पनि खुलेर प्रशंसा गरे । ‘विक्रमले सुरुवातदेखि नै प्राविधिक पाटो हेर्दै आएका छन् । उनले टोलीको प्रशिक्षण हेर्ने र प्रशिक्षण टोलीलाई नै एकसाथ बनाए । यसपटक पनि टोलीको सुरुवातदेखि नै उनी हामीसँग थिए,’ अध्यक्ष रुवेनले भने । प्रशिक्षणमा कविराज राई र रमेश दंगाल टोलीसँग यसै सिजन आबद्ध थिए । त्यसअघि संजिव बुढाथोकी क्लबको प्रशिक्षकका रुपमा थिए । उनी जिल्ला फुटबल संघमा आबद्ध भएपछि क्लबले विकल्प खोजेको थियो ।

चर्च ब्वाइज नाम भएपछि धर्मसँग जोडेर हेर्नेको संख्या पनि छ । मछिन्द्र, बौद्ध, सरस्वती जस्तै क्लबको नाम धर्म नभएर विशुद्ध फुटबल विकास मात्र रहेको राईले बताए । ‘हामीले विशुद्ध फुटबल उद्देश्य बोकेर आएका हौं । चर्च ब्वाइज त नाम मात्र हो । हामी गाउँ गाउँबाट लुकेको प्रतिभालाई स्थान दिन चाहन्छौं । खेलाडीको वृत्तिविकासमा योगदान दिन चाहन्छौं,’ उनले सुनाए ।

विगतमा आर्थिक रुपमा ए डिभिजनका नवप्रवेशी क्लबलाई कठिनाई भएको विषयमा सोध्दा राईले क्लबलाई ए डिभिजनमा टिक्न कुनै समस्या नहुने बताए । ‘हामी दीर्घकालीन सोचसहित आएका हौं । हामीले जति अनुभव गरेका छौं, ए डिभिजनमा टिक्न समस्या हुँदैन । हामीसँग ए डिभिजन खेलेका र व्यवस्थापन हेरेका व्यक्ति हुनुहुन्छ । मैदान भित्र र बाहिर साथ छ,’ उनले थपे, ‘अन्य कर्पोरेट हाउसहरु पनि सहकार्य गर्न इच्छुक छन् । अहिले नै किट स्पोन्सरमा ५ लाख पायौं । आर्थिक रुपमा अन्य संस्थाले पनि साथ दिने भएको छ । आउने दिनमा आर्थिक श्रोत जोड्न सक्छौं ।’

क्लब ए डिभिजन चढ्दाका खेलाडीलाई निरन्तरता दिने प्रयास गर्ने राईले बताए । ‘हामी अहिलेका खेलाडी राख्ने प्रयास गर्नेछौं । वहाँहरुको माग अनुसार सम्बोधन गर्न सकिन्छ भने हामी पक्कै साथ रहनेछौं । अन्य क्लबबाट कस्तो प्रस्ताव आउँछ हामी खेलाडीलाई निर्णय गर्न दिन्छौं । हामी सकेसम्म माथि चढेको टोलीलाई साथ नै राख्ने प्रयास गर्नेछौं,’ उनले थपे ।

ए डिभिजनमा चढेपछि क्लबले खेलाडीका लागि एन्फासमक्ष आफ्नो भनाइ पनि राख्ने बताए । ‘मैले गरेको अध्ययन अनुसार लिग सुधार गर्न धेरै ठाउँ छ । विगतको तुलनामा यसपटक व्यक्तिगत पुरस्कार कटौती गरिएको छ । खेलाडीको हौसला बढाउने पक्षलाई घटाउने होइन, बढाउनु पर्छ । खेलाडी प्रोत्साहन गर्न थप योजना ल्याउनुपर्छ । खेलाडी र फुटबल विकासका लागि हामीले आफ्नो भनाइ निरन्तर राख्नेछौं,’ उनले प्रष्ट पारे ।

सामुहिक प्रयासले ए डिभिजन पुगेको क्लबले आउने दिनमा यसै अनुरुप अघि बढ्ने प्रतिवद्धता राईले सुनाए । ‘यो एकल प्रयासले सम्भव कुरा होइन । जसरी खेलाडी छनोट, व्यावस्थापन र प्रशिक्षणमा तालमेल थियो, यसैलाई निरन्तरता दिनेछौं । आर्थिक पक्षमा पनि हामीलाई सहयोग आउने विश्वास छ । ए डिभिजनमा पनि हामी आफ्नो स्तर देखाएर निरन्तर खेल्न चाहन्छौं,’ अध्यक्ष राईले टुंग्याए ।