काठमाडौं (हाम्रो खेलकुद) – शीर्ष डिभिजनमा उक्लने लक्ष्यमा रहेकोे खुमलटार युथ क्लब र सरस्वती युथ क्लब बराबरीमा रोकिएको छ । सुरुवाती अग्रता लिनका बावजुत खुमलटार ब्वाइज युनियन क्लबसँग १–१ गोलको बराबरीमा रोकिएको हो ।

सातदोबाटोस्थित एन्फा कम्प्लेक्सको खेल मैदानमा आइतबार भएको खेलमा खुमलटारका लागि विक्रान्त नरसिंह राणाले गोल गर्दा ब्वाइज युनियनका मिलन लिम्बुले बराबरी गोल फर्काए ।

प्रतिस्पर्धात्मक खेलको ५७औं मिनेटमा विक्रान्तको गोलबाट खुमलटारले सुरुवाती अग्रता लिएको थियो । ७९औं मिनेटमा मिलन लिम्बुले गोल गर्दै ब्वाइज युनियनलाई हारबाट जोगाए ।

यो बराबरीसँगै तेस्रो स्थानमा उक्लने मौका गुमाएको खुमलटार ११ खेलबाट १६ अंक जोडेर चौथो स्थानमा यथावत रहेको छ । बाँसबारीसँग समान १६ अंक रहेपनि खुमलटार गोलअन्तरमा अघि छ । ब्वाइज युनियन ११ खेलबाट १० अंक जोडेर पुछारबाट एक स्थान सुधार गरेको छ ।

लिगकै अर्काे खेलमा सरस्वती युथ क्लब सामाजिक युथ क्लबसँगको हारबाट जोगिएको छ । सरस्वतीले एक गोलले पछि परेको स्थितिमा सामाजिकसँग १–१ गोलको बराबरी खेलेको हो ।

खेलको नवौं मिनेटमा सुरेश खत्रीको गोलबाट सामाजिकले सुरुवाती अग्रता लिएको थियो । तर, त्यो अग्रतालाई सामाजिकले दोस्रो हाफमा जोगाउन सकेन । ५८औं मिनेटमा केनिस दाहालले गोल गर्दै सरस्वतीलाई हारबाट जोगाए ।

यो बराबरीसँगै सरस्वती ११ खेलबाट १७ अंक जोडेर तेस्रो स्थानमा यथावत रहेको छ । सामाजिक ११ खेलबाट ११ अंक जोडेर १२औं स्थानमा रहेको छ ।

लिगकै अर्काे खेलमा मध्यपुर युथ एसोसिएसन र श्री भगवती क्लब टोखाले गोलरहित बराबरी खेल्दै अंक बाँडेका छन् । यो बराबरीले श्री भगवती ११ खेलबाट १५ अंक जोडेर छैटौं स्थानमा उक्लिएको छ । मध्यपुर १४ अंक जोडेर आठौं स्थानमा रहेको छ ।