एजेन्सी – युइएफए च्याम्पियन्स लिगको क्वाटरफाइनलको पहिलो लेगमा साविकको विजेता इंग्लिस क्लब चेल्सीले घरेलु मैदानमा स्पेनिस क्लब रियल म्याड्रिडको आतिथ्यता गर्दैछ ।

खेल स्टामफोर्ड ब्रिजमा नेपाली समयअनुसार राति १२ः४५ बजे हुने छ । घरेलु मैदानमा हुने पहिलो लेगको खेलमा साविक विजेता चेल्सी रियललाई हराएर सेमिफाइनल पुग्ने सम्भावना बलियो बनाउन चहान्छ । पछिल्लो खेलमा ब्रेन्टफर्डसँग ४–१ ले पराजित भएको चेल्सी रियललाई हराएर जितको लयमा फर्कन चहान्छा ।

टोलीसँग इडुआर्ड मेन्डी, सेसर एज्पिलिक्वेटा, थियागो सिल्भा, एन्टेनियो रुडिगर, रिस जेम्स, जर्गिन्हो, माटियो कोभासिस, मार्काेस अलन्सो, हाकिम जियाच, काई हाभर्टज र क्रिस्टियन पुलिलिस रहेका छन् । यस्तै एङ्गोलो कान्टे, ट्रिभोअ चलोवाह, मासन माउन्ट र टिमो वेर्नर पनि टोलीमा रहेका छन् ।

यता, यो सिजन उच्च लयमा रहेको रियल पनि अवे जित निकाल्दै सेमिफाइनल पुग्ने सम्भावना बलियो बनाउन चहान्छ । टोलीसँग करिम बेन्जेमा, भिनिसियस जुनियर, मार्काे एसेन्सियो, टोनी क्रुस, क्यासमिरो, लुका मोड्रिच, फर्लान्ड मेन्डी, डेभिड अलाबा, इडर मिलिसाओ र थिवाउट कोर्टुवा रहेका छन् । रोड्रिगो, नाचो फर्नान्डेस, मार्सेलो, फेडे भाल्भेर्डे पनि टोलीमा रहेका छन् । चोटका कारण इडेन हाजार्ड र इस्को टोलीमा हुनेछैनन् ।

गत सिजन यि दुई टोलीले सेमिफाइनलमा प्रतिस्पर्धा गर्दा चेल्सीले समग्रमा ३–१ को जित निकाल्दै फाइनल प्रवेश गर्दै च्याम्पियन बन्न सफल भएको थियो । घरेलु मैदानमा भएको पहिलो लेगमा २–० को जित निकालेको चेल्सीले दोस्रो लेगमा १–१ गोलको बराबरी खेलेको थियो ।
चेल्सी सोही प्रदर्शनलाई निरन्तरता दिने लक्ष्यमा मैदानमा उत्रदा रियल उक्त हारको बदला लिने लक्ष्यमा रहनेछ ।

पछिल्लो चार खेलको नतिजामा रियल दुइ खेलमा विजयी हुँदा चेल्सीले एक खेल आफ्नो पक्षमा पारेको छ । एक खेल बराबरीमा सकिएको छ ।