एजेन्सी – युइएफए च्याम्पियन्स लिग अन्तरगतको प्रि–क्वाटरफाइनलको दोस्रो लेगमा आज (मंगलबार) दुई खेलमा प्रतिस्पर्धा हुँदैछ । स्पेनिस क्लब रियल म्याड्रिडले साविक विजेता इंग्लिस क्लब चेल्सीलाई घरेलु मैदानमा आतिथ्यता गर्दैछ ।

खेल सान्टियागो बर्नबेउमा नेपाली समयअनुसार राति १२ः४५ बजे हुनेछ । घरेलु मैदानमा हुने खेलमा रियल चेल्सीलाई हराउँदै दुवै लेगमा जित निकाल्दै सेमिफाइनल पुग्ने दाँउमा हुनेछ । रियलले अवे मैदानमा ३–१ को जित निकालेको थियो ।

बराबरीको नतिजा नै रियललाई सेमिफाइनलमा पुग्न पर्याप्त रहेपनि रियल स्पष्ट जितसहित अघि बढ्न चहान्छ । चेल्सीविरुद्ध फरवार्ड करिम बेन्जेमा नै मुख्य हतियार हुनेछ । उनकै ह्याट्रिक सहयोगमा रियलले पहिलो लेगमा सहज जित हात पारेको थियो ।

यसबाहेक टोलीसँग भिनिसियस जुनियर, रोड्रिगो, मार्काे एसेन्सियो, फेडे भाल्भेर्डे, लुका मोड्रिच, क्यासमिरो, टोनी क्रुस, डेभिड अलाबा, नाचो फर्नान्डेस, ड्यानी कार्भाजल, फर्लान्ड मेन्डी र गोलरक्षक थिवाउट कोर्टुवा रहेका छन् ।

यस्तै ग्यारेथ बेल, मार्सेलो, लुका जोभिक र इडुआर्डाे कामाभिंगा पनि टोलीमा रहेका छन् । प्रतिबन्धका कारण डिफेन्डर इडर मिलिसाओ टोलीमा नरहँदा रियललाई समस्या पर्न सक्नेछ । चोटका कारण इडेन हाजार्ड र इस्को पनि टोलीमा हुनेछैनन् ।

यता, साविक विजेता चेल्सी पनि घरेलु टोलीमाथि स्तब्धपूर्ण नतिजा निकाल्दै सेमिफाइनल पुग्ने दाउमा हुनेछ । चेल्सीलाई सेमिफाइनलमा पुग्न स्पष्ट ३–० को जितको खाँचो छ । तर, यो सिजनमा लयमा रहेको टोली रियलविरुद्ध उसकै मैदानमा यो जित निकाल्न कठिन हुनेछ ।

टोलीसँग फरवार्ड रोमेलु लुकाकु पनि टोलीमा हुनेछैनन् । काई हाभर्टज, टिमो वेर्नर, मासन माउन्ट र क्रिस्टियन पुलिसिसलाई यो जिम्मेवारी बढेको छ । माटियो कोभासिस, एङ्गोलो कान्टे, रिस जेम्स, मार्काेस अलन्सो, एन्टेनियो रुडिगर, थियागो सिल्भा, आन्द्रेस क्रिस्टेन्सेन र गोलरक्षक इडुआर्ड मेन्डी टोलीमा रहेका छन् । कप्तान सिसर एज्पिलिक्वेटा, हाकिम जियाच, जर्गिन्हो र रुवेन लफटस चिक पनि टोलीमा रहेका छन् ।

यस्तै अर्काे खेलमा जर्मन क्लब बायर्न म्युनिखले घरेलु मैदानमा स्पेनिस क्लब भिल्लारियलसँग खेल्दै छ । पहिलो लेगमा १–० गोलले पराजित भएको बायर्न यस खेलमा दबाबमा छ ।