एजेन्सी – युइएफए च्याम्पियन्स लिगको क्वाटरफाइनलको दोस्रो लेगमा आज (बुधबार) राति अन्तिम दुई खेलमा प्रतिस्पर्धा हुँदा स्पेनिस क्लब एट्लेटिको म्याड्रिडले इंग्लिस क्लब म्यानचेस्टर सिटीको आतिथ्यता गर्दैछ ।

खेल वान्डा मेट्रोपोलिटानोमा नेपाली समयअनुसार राति १२ः४५ बजे हुनेछ । पहिलो लेगमा १–० ले पराजित एट्लेटिको घरेलु मैदानमा हुने लेगमा बलियो सिटीलाई स्तब्ध पार्दै सेमिफाइनल पुग्ने दाँउमा हुनेछ ।

तर, सिटीविरुद्ध एट्लेटिकोलाई जित निकाल्न सहज हुनेछैन । एट्लेटिकोलाई सेमिफाइनल पुग्न कम्तीमा पनि २–० को जितको खाँचो छ । १–० को जितले पनि एट्लेटिकोको सेमिफाइनल पुग्ने सम्भावना रहन्छ । बराबरी या हारले एट्लेटिकोको च्याम्पियन्स लिग यात्रा क्वाटरफाइनलमै रोकिनेछ ।

बलियो सिटीविरुद्ध अघिल्लो साता लगातार दवाव झेलेपनि एट्लेटिकोले आफ्नो रक्षापङ्ति तोड्न दिएको थिएन । टोलीसँग जोआओ फेलिक्स, एन्जल कोरेआ, रेनान लोडी, कोकी, मार्काेस लोरेन्टे, रेइनिल्डो, फिलिपे, साभिक र गोलरक्षक जान ओब्लाक रहेका छन् ।

एन्टोइन ग्रिजमन, लुइस सुआरेज, रोड्रिगो डि पउल, यान्निक करास्को र म्याथिअस कुन्हा पनि टोलीमा रहेका छन् । यता, सिटी पनि घरेलु टोलीलाई हराउँदै सेमिफाइनलमा पुग्ने दाँउमा हुनेछ । बराबरीको नतिजाले पनि सिटी अघिल्लो चरणमा पुग्नेछ ।

टोलीसँग फिल फोडेन, रियाद महारेज, ज्याक ग्रेलिस, बर्नाडो सिल्भा, रोड्री, केभिन डि ब्रुयन, जोओ क्यान्सेलो, एमेरिक लोपोर्टा, जोन स्टोन्स, केल वाल्कर र गोलरक्षक इडर्सन मोराएस रहेका छन् । प्रतिबन्धका कारण गाब्रियल जेसस टोलीमा हुनेछैनन् ।

च्याम्पियनस लिगकै अर्काे खेलमा इंग्लिस क्लब लिभरपुलले घरेलु मैदानमा पोर्चुगिज क्लब बेन्फिकासँग खेल्दैछ । पहिलो लेगमा ३–१ को अवे जित निकालेको लिभरपुल घरेलु मैदान एनफिल्डमा पनि सोही नतिजा दोहो¥याउँदै सेमिफाइनलमा पुग्ने लक्ष्यमा हुनेछ ।

२–० को हारले पनि लिभरपुल सेमिफाइनलमा पुग्नेछ । बेन्फिकालाई सेमिफाइनल पुग्न कम्तीमा पनि ३–० को जितको खाँचो छ ।