एजेन्सी – इंग्लिस क्लब चेल्सीका जर्मन डिफेन्डर एन्टोनियो रुडीगर स्पेनिस क्लब रियल म्याड्रिडमा अनुबन्धित हुने भएका छन् । सिजनको अन्त्यसँगै चेल्सीसँग सम्झौता समाप्त भएपछि उनी रियल जानेछन् ।

२९ वर्षीय डिफेन्डरले यसअघि राख्दै आएको १२ मिलियन युरो प्रति सिजनको मागमा लचकता अपनाएसँगै रियलले सम्झौता गर्न राजी भएको हो । रियलसँगै युरोपका शीर्ष क्लबले पनि रुडीगरलाई नजरमा राख्दै आएका थिए । चेल्सीले सम्झौता नविकरण गर्ने अवस्था नभएपछि रुडीगरमाथि धेरैको चासो रहेको थियो । फ्री एजेन्ट भएकाले रुडीगर सित्तैमा रियल जानेछन् ।

रियल र रुडीगरबीच प्रारम्भिक सहमति भइसकेको छ । इटालियन संचारकर्मी फाब्रिजियो रोमानोका अनुसार यसै साता दुई पक्षबीच लिखित सहमति हुने सम्भावना छ । फिफाले सम्झौताको अन्तिम ६ महिना बाँकी रहँदा अन्य क्लबसँग सम्झौता गर्न पाउने नियम राखेको छ । यसअघि रियलले बायर्न म्युनिखबाट डेविड अलाबालाई पनि सित्तैमा अनुबन्ध गरेको थियो ।

इटालियन प्रशिक्षक कार्लो एन्चेलोटिले टोलीको डिफेन्स बलियो पार्न लामो समयदेखि उनलाई नजरमा राखेका थिए । रियालमा अलाबासँगै एडर मिलिसाओ, नाचो फर्नान्डेज र जेसस भालेहो टोलीमा रहेका छन् । च्याम्पियन्स लिगमा रुडीगरको उत्कृष्ट प्रदर्शनले पनि रियल उनलाई अनुबन्ध गर्न हतारिएको हो ।

चेल्सीका प्रशिक्षक थोमस टुचेलले पनि रुडीगरले क्लब छाड्ने पक्का भएको बताए । ‘उनले मलाई क्लब छाड्ने इच्छाबारे बताएका छन् । हामीले क्लबका लागि सक्दो प्रयास गरेका हौं । तर क्लबको अहिलेको अवस्था हेर्दा हामीले केहि गर्न सक्ने अवस्था छैन,’ उनले भने ।