एजेन्सी – फरवार्ड मासन माउन्टले एक गोलसँगै एक असिस्ट दिएपछि शीर्ष चारको दौडमा रहेको लन्डन क्लब चेल्सीले इंग्लिस प्रिमियर लिगमा सानदार जित निकालेको छ ।

चेल्सीले १० खेलाडीमा समेटिएको लिड्स युनाइटेडलाई उसकै मैदानमा ३–० ले पराजित गरेको हो । चेल्सीको जितमा मासन माउन्ट, क्रिस्टियन पुलिसिस र रोमेलु लुकाकुले गोल गरे । चेल्सीले पहिलो हाफमा एक तथा दोस्रो हाफमा दुई गोल गर्न सफल भएको थियो ।

एलान्ड रोडमा बुधबार राति भएको खेलको चौथो मिनेटमा मासन माउन्टको गोलबाट चेल्सीले सुरुवाती अग्रता लिन सफल भएको थियो । उनले रिस जेम्सको पासमा गोल गर्न सफल भएका थिए ।

२४औं मिनेटमा घरेलु टोली लिड्स १० खेलाडीमा समेटिदा चेल्सीलाई जित निकाल्न थप सहज भएको थियो । ड्यानियल जेम्स सिधै रातो कार्ड खाँदै मैदानबाट बाहिरिएपछि घरेलु टोली लिड्स समस्यामा पर्दा त्यसको फाइदा चेल्सीले उठाउन सफल भयो ।

५५औं मिनेटमा क्रिस्टियन पुलिसिसले गोल गर्दै चेल्सीको अग्रता दोब्बर पारे । उनले मासन माउन्टको पासमा गोल गर्न सफल भएका थिए । ८३औं मिनेटमा रोमेलु लुकाकुले हाकिम जियाचको पासमा गोल गर्दै चेल्सीको सहज जित पक्का गरे ।

यो जितसँगै तेस्रो स्थानमा रहेको चेल्सीको ३६ खेलबाट ७० अंक पुगेको छ । एक खेल कम खेलेको आर्सनलको ६६ अंक छ । पराजित लिड्सलाई रेलिगेसन दवाव बढेको छ । लिड्स ३४ अंक जोडेर १८औं स्थानमा रहेको छ ।

प्रिमियर लिगकै अर्काे खेलमा लेस्टर सिटीले नर्विच सिटीलाई ३–० ले पराजित गर्दा वाट्फोर्ड र एभर्टनले गोलरहित बराबरी खेल्दै अंक बाँडेका छन् ।