काठमाडौं (हाम्रो खेलकुद) – नेपाली मिडफिल्डर रोहित चन्द इन्डोनसियन लिग वान क्लब पर्सिक कदिरी एफसीमा अनुबन्धित भएका छन् । पर्सिकले आइतबार सामाजिक सञ्जाल फेसबुकबाट रोहितलाई अनुबन्ध गरिएको जनाएको छ ।
३० वर्षीय रोहित लिग वान क्लब पर्सिजा जाकर्ताबाटै अर्काे लिग वान क्लब पर्सिकमा अनुबन्ध भएका हुन् । सम्झौता रकम र अवधि भने खुलाइएको छैन । इन्डोनेसियामा रोहितको यो तेस्रो क्लब हो । यसअघि रोहितले पर्सिजाबाट खेल्नुअघि सुरुवातमा पीएसपीएस पेकानबारुबाट लिग खेलेका थिए ।
पर्सिजाले रोहितलाई फुकुवा गरेको २४ घन्टा नबित्दै पर्सिकले आबद्ध गरेको हो । पर्सिजाले शनिबार आफ्नो आधिकारिक फेसबुक पेजमार्फत रोहितसँगको सम्झौता सकिएको र क्लबबाट अलग भएको घोषणा गरेको थियो ।
सन् २०१७ मा पर्सिजामा आबद्ध भएका रोहितले त्यहाँबाट पाँच सिजन लिग २०१८ मा लिग वानसहित चार उपाधि जित्न सफल भएका छन् । उनी त्यतिबेला लिग वानकै सर्वाेत्कृष्ट खेलाडी चुनिदै गोल्डेन बल जितेका थिए ।
