एजेन्सी – जर्मन क्लब बायर्न म्युनिखका भेट्रान गोलरक्षक तथा कप्तान म्यानुएल नुयरले क्लबसँगको सम्झौता नवीकरण गरेका छन् ।
बुन्डेसलिगा च्याम्पियन बायर्नले सोमबार आफ्नो भेट्रान गोलरक्षक नुयरले सम्झौता नवीकरण गरेको जनाएको छ । जर्मन गोलरक्षक नुयरले थप दुई वर्षको सम्झौता नविकरण गरेका हुन् । अब सन् २०२४ सम्म बायर्नमा रहनेछन् । बायर्नले यस सिजनको जर्मन बुन्डेसलिगाको उपाधि जित्ने क्रममा नुयरले १० क्लिन सिट राख्न सफल भएका थिए ।
३६ वर्षीय नुयर सन् २०११ मा साल्केबाट बायर्न आएका थिए । त्यसयता उनी बायर्नको नियमित र पहिलो रोजाईको सदस्य छन् । नुयरले बायर्नका लागि ४ सय ७३ खेल खेलिसकेका छन् ।
उनले बायर्नबाट १० पटक बुन्डेसलिगा, ५ पटक डिएफवी पोकल, ६ पटक डिएफवी सुपरकप, २ पटक च्याम्पियन्स लिग, २ पटक युइएफए सुपर कप र २ पटक फिफा क्लब विश्वकप जितेका छन् ।
