काठमाडौं (हाम्रो खेलकुद) – घरेलु फुटबलको सफल र चर्चित प्रशिक्षकको छवि बनाइसकेका प्रशिक्षक मेघराज केसीलाई यू–२० राष्ट्रिय टोलीको मुख्य प्रशिक्षकमा नियुक्त भएका छन् ।

अखिल नेपाल फुटबल संघ (एन्फा) को प्राविधिक समितिको सिफारिसमा केसीलाई बिहीबार मुख्य प्रशिक्षकको जिम्मेवारी प्रदान गरेको हो । ‘ए’ डिभिजनको सातदोबाटो युथ क्लब र रुस्लान थ्री स्टार क्लबको मुख्य प्रशिक्षक रहिसकेका केसीले यसअघि पनि उमेर समूहको टोलीलाई प्रशिक्षण दिइसकेका छन् ।

प्रशिक्षक केसीकै प्रशिक्षणमा नव प्रवेशी सातदोबाटो युथ क्लबले शीर्ष डिभिजनको पहिलो सिजन नै चौथो स्थानमा लिग सकाएको थियो ।

मुख्य प्रशिक्षकमा नियुक्त भएसँगै प्रशिक्षक केसीले अहिलेको लागि भारतमा जुलाई २५ देखि अगस्ट ३ सम्म हुने साफ यू–२० च्याम्पियनसिपमा ध्यान केन्द्रित हुने बताए । उनले त्यसपछि मात्रै एएफसी यू–२० एसियन कप छनोटको प्रतीक्षा गर्न सकिने थपे ।

नेपालले साफ यू–२० च्याम्पियनसिपको आफ्नो पहिलो खेल जुलाई २५ मा माल्दिभ्ससँग खेल्नेछ भने दोस्रो खेल जुलाई २७ मा श्रीलंकासँग र त्यसपछि ३१ मा भारतसँग खेल्नेछ । नेपालले समूहको अन्तिम खेल अगस्ट २ मा बंगलादेशसँग खेल्नेछ ।

सेप्टेम्बर १० देखि १८ सम्म बहराइनमा हुने एएफसी यू–२० एसिया कप छनोटमा कतार, बहराइन, बंगलादेश र भुटानसँगै राष्ट्रिय यू–२० टोली पनि परेको छ ।

नेपालले आफ्नो पहिलो खेल सेप्टेम्बर १० मा भुटानसँग र दोस्रो खेल सेप्टेम्बर १२ मा कतारसँग खेल्नेछ भने तेस्रो खेल सेप्टेम्बर १४ मा बहराइनसँग र चौथो खेल सेप्टेम्बर १८ मा बंगलादेशसँग खेल्नेछ । यू–२० टोलीको छनोट जुन ४ देखि ७ गतेसम्म एन्फा कम्प्लेक्समा हुनेछ ।