हेटौडा (हाम्रो खेलकुद) – विभागीय टोलीद्धय नेपाल पुलिस क्लब र नेपाल एपीएफ क्लब मकवानपुरमा जारी स्थानीय तह शहिद स्मृति चौथो मकवानपुर गोल्डकप फुटबल प्रतियोगिताको क्वाटरफाइनलमा प्रवेश गरेका छन् ।

पुलिसले ‘ए’ डिभिजनको नव प्रवेशी खुमलटार युथ क्लबलाई २–१ ले पराजित गर्दै अन्तिम आठमा स्थान पक्का गरेको हो ।
हेटौंडाको पिप्ले क्याम्पा रंगशालामा आइतबार भएको खेलमा पुलिसको जितमा अभिषेक रिजाल र भरत साहले गोल गरे । खुमलटारका अजित लामाले एक गोल फर्काए ।

वर्षाले प्रभावित बनेको खेलको तेस्रो मिनेटमा अभिषेक रिजालले गोल गर्दै पुलिसलाई सुरुवाती अग्रता दिलाए । ३५औं मिनेटमा भरत साहले गोल गर्दै पुलिसको अग्रता दोब्बर पारे । ८५औं मिनेटमा अजित लामाले गोल गर्दै खेललाई २–१ को अवस्थामा ल्याएपनि हार टार्न सकेन ।

पुलिसविरुद्ध उच्च प्रदर्शन गरेका खुमलटारका दिवस छन्त्याल प्लेयर अफ दि म्याच घोषित भए । उनले १० हजार रुपैया हात पारे । अब पुलिसले क्वाटरफाइनलमा मंगलबार मनाङ–मर्स्याङ्दी क्लबको सामना गर्नेछ ।

आइतबार बिहानै भएको अर्काे खेलमा एपिएफले फ्रेण्डस क्लबमाथि ३–० को जित निकाल्दै क्वाटरफाइनल यात्रा तय गरेको छ । शनिबार हुने भनिएको खेल वर्षाका कारण हुन नसकेपछि आइतबार खेलाइएको हो ।

एपिएफको सहज जितमा नविन लामा, सबिन गुरुङ र रबि थिङले गोल गरे । एपिएफका प्रदिप लामा म्यान अफ द म्याच घोषित भए । उनले १० हजार रुपैयाँ हात पारे ।

मकवानपुर जिल्ला फुटबल संघको आयोजनामा जारी प्रतियोगिताको विजेताले उपाधिसहित नगद १५ लाख हात पार्नेछ भने उपविजेताले १० लाख प्राप्त गर्नेछ । फाइनल जेठ ३० मा हुनेछ ।