एजेन्सी – परिवर्तित खेलाडीको रुपमा मैदान छिरेका युवा स्टार केलियन एमबाप्पेको गोलमा फ्रान्स युइएफए नेसन्स लिग ए ग्रुप १ मा हारबाट जोगिएको छ । फ्रान्सले अष्ट्रियासँग १–१ गोलको बराबरी खेलेको हो ।

वेइन अष्ट्रियामा शुक्रबार राति भएको नेसन्स लिग ए ग्रुप १ को खेलमा घरेलु टोलीका लागि एन्ड्रिएस वेइमानले गोल गर्दा फ्रान्सका एमबाप्पेले बराबरी गोल फर्काएका थिए ।

खेलको ३७औं मिनेटमा एन्ड्रिएस वेइमानले गोल गर्दै घरेलु टोलीलाई सुरुवाती अग्रता दिलाए । उनले कोनराड लेइमेरको पासमा गोल गर्न सफल भएका थिए । तर, त्यो अग्रतालाई अष्ट्रियाले बचाउन सकेन ।

८३औं मिनेटमा परिवर्तित खेलाडी एमबाप्पेले गोल गर्दै फ्रान्सलाई हारबाट जोगाए । ६३औं मिनेटमा एन्टोइन ग्रिजमनको स्थानमा मैदान छिरेका एमबाप्पेले अर्का परिवर्तित खेलाडी क्रिस्टोफोर एनकुुकुको पासमा गोल गर्न सफल भएका थिए । एनकुुकु ७९औं मिनेटमा किङ्सले कोमानको स्थानमा मैदान छिरेका थिए ।

यो बराबरीसँगै अष्ट्रिया दुई खेलबाट ४ अंक जोडेर दोस्रो स्थानमा रहेको छ । डिफेन्डिङ च्याम्पियनसमेत रहेको फ्रान्सले कमजोर सुरुवात गर्दा ३ खेलबाट २ अंक मात्रै जोड्न सकेको छ । यो समूहमा डेनमार्क ६ अंक जोडेर शीर्षस्थानमा रहँदा क्रोएसिया ४ अंक जोडेर तेस्रो स्थानमा छ ।