काठमाडौं (हाम्रो खेलकुद) – सेन्ट जेभियर्स स्कुल, जावलाखेलले २१ औं फादर मोरन स्मृति अन्तरविद्यालय आमन्त्रण फुटबल प्रतियोगिताको उपाधि जितेको छ । सेन्ट जेभियर्सले मंगलबार भएको फाइनलमा नेपाल डनबस्को स्कुललाई २–१ ले हराउँदै अन्तरविद्यालय च्याम्पियन बनेको हो ।
विजयी टोलीका लागि निशान्त थापा मगर र स्पर्शजंग पाण्डेले गोल गरे । डनबस्कोका माइकल तामाङले गोल फर्काउका थिए । आयोजक सेन्ट जेभियर्स स्कुल, गोदावरीको रातो टिमले क्रेसेन्ट एकेडेमीलाई २–१ ले हराउदै तेश्रो भयो । डनबस्कोका माइकल तामाङ उत्कृष्ट खेलाडी, विद्या संस्कारका उमिद रायमाझी उत्कृष्ट गोलकिपर, सेन्ट जेभियर्स गोदावरी रातोका सुमित थापा उत्कृष्ट रक्षक , सोही टोलीका थोमस तामाङ मोस्ट प्रोमिसिङ प्लेयरबाट सम्मानित भए ।
सेन्ट जेभियर्स जावलाखेलका ओमकृष्ण श्रेष्ठ उत्कृष्ट प्रशिक्षक चुनिए । प्रतियोगिताभर १३ गोल गरेका उपाधि विजेता टोलीका निशान्त थापा मगर सर्वाधिक गोलकर्ता बने । नेपाल टेलिकमको प्रायोजनामा मंसिर १८ गतेदेखि सुरु प्रतियोगितामा १२ टिम सहभागी थिए ।
