एजेन्सी – कप्तान तथा स्टार भेट्रान फरवार्ड क्रिष्टियानो रोनाल्डोविना मैदान उत्रिएको पोर्चुगलले युइएफए नेसन्स लिग ए ग्रुप २ मा पहिलो हार बेहोरेको छ । पोर्चुगल घरेलु टोली स्वीट्जरल्यान्डसँग १–० ले पराजित भएको हो ।

स्वीट्जरल्यान्डमा आइतबार राति भएको खेलमा घरेलु टोलीको जितमा हरिस सेफेरोभिकले गरेको गोल नै निर्णायक बन्यो । उनले खेलको पहिलो मिनेटमा नै सिल्भान विडमेरको पासमा गोल गर्न सफल भएका थिए ।

सम्हालिन नपाँउदै गोल खाएको पोर्चुगलले त्यसपछि बल पोसेसन राख्दै घरेलु टोलीलाई दवावमा राखेपनि बलियो रक्षापङ्ति तोड्न नसक्दा पराजित हुन पुग्यो । स्वीट्जरल्यान्डले भने आफ्नो अग्रतालाई जोगाउँदै पोर्चुगललाई पहिलो हार चखाउन सफल भयो ।

स्वीट्जरल्यान्डविरुद्ध टोलीका सर्वाधिक गोलकर्तासमेत रहेका लेजेन्ड रोनाल्डो २३ सदस्यीय टोलीमै रहेका थिएनन् । उनी नहुँदा टोलीमा केही प्रभाव देखिएको थियो । यसअघि गत साता पोर्चुगलले ४–० को फराकिलो जित निकाल्दा रोनाल्डोले दुई गोल गरेका थिए ।

पहिलो जितसँगै स्वीट्जल्यान्डले ४ खेलबाट ३ अंक जोडेको छ । टोली पुछारमै रहेको छ । पोर्चुगल ७ अंक जोडेर दोस्रो स्थानमा झरेको छ । स्पेन ८ अंक जोडेर शीर्षस्थानमा उक्लदा चेक रिपब्लिक ४ अंक जोडेर तेस्रो स्थानमा रहेको छ ।