एजेन्सी – भेट्रान मिडफिल्डर तथा कप्तान लुका मोड्रिचको गोलमा क्रोएसियाले विश्व तथा नेसन्स लिग विजेता फ्रान्सलाई पराजित गरेको छ । फ्रान्स घरेलु मैदानमा क्रोएसियासँग १–० ले पराजित भएको हो ।

पेरिसमा सोमबार राति भएको खेलमा पाहुना टोली क्रोएसियाको जितमा कप्तान मोड्रिचले पाँचौ मिनेटमा पेनाल्टीमार्फत गरेको गोल नै निर्णायक बन्यो । कर्नरबाट आएको बलमा इब्राहिमा कोनाटले एन्टे बुदिमिरलाई फउल गर्न पुगेपछि रेफ्रीले क्रोएसियालाई पेनाल्टी प्रदान गर्दा मोड्रिच चुकेनन् ।

एक गोलले पछि परेको फ्रान्सले बल पोसेसन राख्दै क्रोएसियामाथि दवाव बढाएपनि गोल गर्न नसक्दा टोलीले घरेलु मैदानमा हार बेहोर्न पुग्यो । क्रोएसियाले भने उक्त अग्रतालाई जोगाउँदै जित निकाल्न सफल भयो । क्रोएसियाले फ्रान्सलाई १०औं खेलमा हराएको हो । यसअघिको ९ भेटमा ६ खेलमा हार बेहोर्दा ३ खेल बराबरीमा सकिएको थियो ।

यो हारसँगै साविकको विजेता फ्रान्स नेसन्स लिगको अन्तिम चारको लागि छनोट हुन असफल भएको छ । फ्रान्स नेसन्स लिग ए ग्रुप १ मा जितविहीन बन्दै छनोट हुन असफल भएको हो । फ्रान्सले दुईमा हार र दुईमा बराबरी खेल्दै समूहमा २ अंक जोडेर पुछारमा रहेको छ । टोली शीर्ष स्थानको डेनमार्कसँग ७ तथा दोस्रो स्थानको क्रोएसियासँग ५ अंकले पछि परेको छ ।

यो जितपछि क्रोएसियाको ४ खेलबाट ७ अंक पुगेको छ । पराजित फ्रान्स २ अंक जोडेर पुछारमा रहेको छ । डेनमार्क ९ अंक जोडेर शीर्षस्थानमा रहँदा अष्ट्रिया ४ अंक जोडेर तेस्रो स्थानमा रहेको छ । अब समूह चरणमा दुई खेल बाँकी रहँदा फ्रान्सलाई रेलिगेसनको डर बढेको छ ।