एजेन्सी – दक्षिण एसियाली राष्ट्र भारत एएफसी एसियन कप २०२३ का लागि छनोट भएको छ । भारत समूह चरणको एक खेल बाँकी छँदै पाँचौपटक एसियन कपमा छनोट हुन सफल भएको हो ।

एएफसी एसियन कप छनोटअन्तरगत समूह बीको खेलमा प्यालेस्टाइनले फिलिपिन्सलाई ४–० ले पराजित गरेपछि समूह डी मा रहेको भारतले एक खेल खेल्नु अघि नै एसियन कपमा स्थान बनाएको हो ।

समूह डी मा दुई खेलबाट ६ अंक जोडेको भारत दोस्रो स्थानमा छ । समान अंक भएको हङकङ भने शीर्ष स्थानमा छ । सोही समूहमा रहेका अफगानिस्तान र कम्बोडिया बाहिरिएका छन् । मंगलबार प्यालेस्टाईनले फिलिपिन्सलाई हराएपछि कम्तीमा पनि दोस्रो उत्कृष्ट टोलीका रुपमा भारतको एसियन कपमा स्थान पक्का भएको थियो ।

अन्तिम खेलको समाप्ती पश्चात् समूह बी मा ४ अंकका साथ फिलिपिन्स दोस्रो स्थानमा छ । यस अर्थमा एक खेल खेल्न बाँकी छँदै फिलिपिन्सको भन्दा बढीे अंक भएपछि भारत भाग्यमानी सावित भएको हो ।

समूह चरणको अन्तिम खेलमा भारतले मंगलबार राती नै हङकङसँग खेल्दैछ । यो खेलको नतिजाले समूह डी को विजेता र उपविजेताको टुंगो लाग्नेछ ।

भारत एसियन कपको इतिहास मै पहिलोपटक लगातार दुई संस्करणको एसियन कपका लागि छनोट भएको हो । यसअघि सन् २०१९ मा युएईमा सम्पन्न गत संस्करणको एएफसी एसियन कपमा पनि भारतले सहभागिता जनाएको थियो । त्यसबेला भारत समूह चरणबाटै बाहिरिएको थियो ।

एसियन कपको इतिहासमा भारतले उत्कृष्ट नतिजा भने सन् १९६४ मा हात पारेको थियो । त्यतिबेला फाइनलसम्म पुगेको भारत इजरायलसँग पराजित भएको थियो ।