एजेन्सी – इंग्लिस प्रिमियर लिग क्लब म्यानचेस्टर सिटीका पूर्व कप्तान तथा लेजेन्ड सेन्टर ब्याक भिन्सेन्ट कोम्पनी बर्नलेको प्रशिक्षकमा नियुक्त भएको छ ।

यसअघि बेल्जियन क्लब एन्डरलेक्टको प्रशिक्षक रहेका कोम्पनी च्याम्पियनसिप क्लबमार्फत प्रशिक्षकको भूमिकामा इंग्ल्याण्ड फर्किन लागेका हुन् । दुई वर्ष एन्डरलेक्टका प्रशिक्षक रहेका कोम्पनीले आपसी समझदारीमा बेल्जियन क्लब छाड्दै च्याम्पियनसिप क्लब रोजेका हुन् ।
३६ वर्षीय कोम्पनीले अब बर्नलेमा माइक ज्याक्सनको स्थान लिनेछन् । गत अप्रिलमा सिन डायचलाई बर्खास्त गर्दै बर्नलेले माइकलाई अन्तरिम प्रशिक्षक बनाएको थियो तर उनले टिमलाई प्रिमियर लिग रेलिगेसनबाट बचाउन सकेनन् ।

बर्नलेमा अनुबन्ध भएपछि कोम्पनीले आफू चुनौतीका लागि उत्साहित रहेको बताए । ‘म चुनौतीलाई लिएर उत्साहित छु ।’ कोम्पनीले भने ‘बर्नले साँच्चै ऐतिहासिक इंग्लिस क्लब हो । टोलीको प्रशिक्षक बन्न पाउँदा उत्साहित छु ।’

कोम्पनीले २०१९ मा आफ्नो बाल्यकालको क्लब एन्डरलेक्टमा खेलाडी र प्रशिक्षकको रुपमा आबद्ध भएका थिए । त्यहीबाट उनले प्रशिक्षणको करिअर सुरु गरेका थिए । कोम्पनीले २०२० अगस्टमा एन्डरलेक्टको प्रशिक्षण सम्हालेका थिए । उनको प्रशिक्षणमा एन्डरलेक्टले ९० खेल खेल्दा ४१, जित, ३० बराबरी र १९ हारको नतिजा निकालेको छ ।

उनको प्रशिक्षणको पहिलो वर्ष एन्डरेलेक्ट बेल्जियन लिगमा चौथो भएको थियो । उनको टोली च्याम्पियन क्लब ब्रुगभन्दा ११ अंकले पछि रहेको थियो । कोम्पनीले यसअघि ११ वर्ष सिटीबाट फुटबल खेल्दा चार प्रिमियर लिगसहित १० उपाधि जितेका थिए ।