पेसिर (एजेन्सी)– चौथो पटक बालोन डी’ओर अवार्ड जितेका रियल मड्रिड स्टार क्रिस्टियानो रोनाल्डोले आफु र बार्सिलोनाका लियोनल मेस्सीसँगै खेल्दा अझै बढी सफलता प्राप्त गर्न सक्ने विश्वास व्यक्त गरेका छन् । बालोन डी’ओर अवार्डमा रोनाल्डोले मेस्सीलाई पछ्याइरहेका छन् । मेस्सी र एट्लेटिको एन्टोनियो ग्रिजम्यानलाई पछि पार्दै रोनाल्डोले सोमबार चौथो पटक उक्त अवार्ड जितेका हुन् ।

मेस्सीको तारिफ गर्दै उनले यदि दुवै जनाले एउटै टोलीका लागि खेल्दा त्यो धेरै चाखलाग्दो हुने बताएका छन् । पोर्चुगलका कप्तान समेत रहेको रोनाल्डोले एउटै क्लबबाट खेल्दा अवार्डका लागि अझै कडा टक्कर हुने पनि अनुमान गरे । सन् २०१० यता रोनाल्डो र मेस्सीले मात्र बालोन डी’ओर अवार्ड जित्दै आएका छन् ।

‘हामी दुवै एउटै क्लबबाट खेल्दा त्यो झनै रोचक हुनेछ’ रोनाल्डोले भने,‘मलाई लाग्छ महान खेलाडीहरुले सँगै खेल्नुपर्छ । यदि हामी दुवै एउटै टिमबाट खेल्थ्यो भने उनले भन्दा मैले बढी सफलता पाउने थिए । तर, उनी पनि कमजोर भने हुने थिएनन् । सबैलाई थाहा छ मेस्सी कति महान खेलाडी हुन् भन्ने, उनीले पाँच पटक बालोन डी’ ओर जितिसकेका छन् ।’

व्यक्तिगत सफलता प्राप्त गरेपछि ३१ बर्षे स्टार पुन क्लब फुटबलतर्फ केन्द्रित हुन चाहेका छन् । उनले जापानमा जारी क्लब विश्व कपमा सफलता प्राप्त गर्ने विश्वास पनि व्यक्त गरेका छन् । क्लब विश्वकपको सेमिफाइनलमा बिहीबार रियलले क्लब अमेरिकाको सामना गर्दैछ । क्लब विश्व कपलाई उनले सिजनको उपाधिको सुरुआतका रुपमा लिएका छन् ।

‘मेरो अहिलेको वास्तविक लक्ष्य भनेको महत्वपूर्ण उपाधि क्लब विश्वकप जित्नु हो ’ उनले थपे ‘ यो पछि ला लिगा उपाधि हो, जुन रियल जित्न चाहन्छ । सम्भव भएसम्म पुनः च्याम्पियन्स लिग र कोपा डेल रे । म सधै सबै जित्न चाहन्छु ।’