पोखरा (हाम्रो खेलकुद) – यसै वर्ष शीर्ष डिभिजनमा उक्लिएको चर्च ब्वाइज युनाइटेड पोखरा हेमजामा जारी छैटौं नेपाल आइस शुभकामना गोल्डकप फुटबल प्रतियोगितामा सेमिफाइनलमा प्रवेश गरेको छ ।

गौरीशंकर खेल मैदानमा आइतबार भएको दोस्रो क्वाटरफाइनलमा कालिका स्पोट्र्स क्लबलाई १–० ले पराजित गर्दै चर्च ब्वाइजले अन्तिम चारमा स्थान पक्का गरेको हो । दोस्रो हाफमा आशिष चौधरीले गरेको गोल नै चर्च ब्वाइजको जितमा निर्णायक बन्यो । उनले खेलको ५३ औं मिनेटमा गोल गरेका थिए ।

निकै नै प्रतिस्पर्धात्मक बनेको खेलमा दुवै टोलीले गोलका केही अवसर सिर्जना गरेपनि थप गोल निस्कन नसक्दा दोस्रो हाफको शुरुमा लिएको अग्रताले चर्च ब्वाइज अन्तिम चारमा पुग्न सफल भयो ।

खेलको दोस्रो मिनेटमा नै चर्च ब्वाइजका कप्तान मिलन राईको पासमा आशिष चौधरीको प्रहारले पोस्टको दिशा लिन सकेन । २५औं मिनेटमा निशान खड्काको लामो प्रहारलाई कालिकाका गोलरक्षक प्रदिप भण्डारीले उत्कृष्ट बचाउ गर्दा रिवाउन्डमा आशिषको पासमा हेमन्तको प्रहारले पोस्टको दिशा लिन सकेन ।

५३औं मिनेटमा चर्च ब्वाइजका आशिष चौधरीले गोल गर्दै चर्च ब्वाइजलाई अग्रता दिलाए । अशोक खवासको लामो पासलाई आसिषले नियन्त्रणमा लिदैं गरेको प्रहार गोलरक्षक प्रदिप भण्डारीलाई बिट गर्दै गोलमा परिणत भयो । त्यसपछि थप गोल निस्कन नसक्दा चर्च ब्वाइज विजयी हुन सफल चयो ।

खुमलटार युथ क्लब र बागमती युथ क्लब बीच तेस्रो क्वाटरफाइनल खेल हुनेछ । प्रतियोगितामा कुल ८ टिमको सहभागिता रहेको छ ।