काठमाडौं (हाम्रो खेलकुद) – नेपाली पुरुष राष्ट्रिय फुटबल टोलीका सदस्य रहिसकेका मिडफिल्डर योगेश गुरुङको घुँडाको सफल शल्यक्रिया भएको छ ।

गत सिजन चर्च ब्वाइज युनाइटेडलाई सहिद स्मारक ‘बी’ डिभिजन लिग च्याम्पियन बनाउन महत्व भूमिका खेलेका गुरुङको आइतबार ग्वार्कोस्थित बी एन्ड बी अस्पतालमा शल्यक्रिया सम्पन्न भएको हो ।

‘बी’ डिभिजन लिग अन्तर्गत नयाँबस्ती युथ क्लबविरुद्धको खेलमा ल्यान्डिङ नमिल्दा उनले बायाँ खुट्टाको घुँडामा चोट बोक्न पुगेका थिए । त्यस यता उनी मैदान बाहिर रहेका छन् । घुँडाको एमआरआई रिपोर्टमा उनको एसीएल र मिनिस्कसमा चोट लागेको देखिएको क्लबका फिजियो आरज्ञ खड्काले बताए ।

‘एमआरआई रिपोर्ट अनुसार बी एन्ड बीका वरिष्ठ डाक्टर डा. अमित जोशीले शल्यक्रिया गर्नुपर्ने सुझाव दिनुभयो । त्यही अनुसार हामीले खेलाडीलाई दुई हप्ता प्रि रिह्याव गरायौ । शल्यक्रिया अलि अगाडि नै हुनुपर्ने हो तर स्थानीय चुनावले गर्दा केहि ढिलाई भयो ।’ फिजियो आरज्ञाले भने, ‘डक्टरको अनुसार शल्यक्रिया राम्रै भएको छ । अब केही हप्ताको आरामपछि हामी उनको रिह्याव सुरु गर्नेछौ । उनलाई चाँडो भन्दा चाँडो मैदानमा फर्काउन प्रयास गर्नेछौ ।

शल्यक्रियापछि उनको अवस्था सामान्य नै रहेको छ । उनलाई मैदान फर्कन कम्तीमा पनि ६ देखि ९ महिना लाग्न सक्ने छ ।
दुई पटक सहिद स्मारक ‘ए’ डिभिजन लिग च्याम्पियन गुरुङको घुँडामा लागेको यो पहिलो चोट भने हैन । दुई वर्ष पहिले उनले दायाँ खुट्टाको घुँडामा एसीएल र मिनिस्कस कै चोट बोकेको थियो ।

लामो समय थ्री स्टारमा बिताएका उनले त्यहीबाट २०६९ मा लिग जितेको थियो । योगेशले २०७५ मा च्यासलबाट खेलेका थिए । त्यसपछि उनी मछिन्द्र फुटबल क्लबमा आबद्ध भएका थिए । उनले मनिन्द्रबाट २०७६ मा लिग जित्न सफल भएका छन् । उनले मोफसलमा थ्री स्टारसँगै झापा ११ फुटबल क्लबलगायतका अन्य क्लबहरुबाट पनि खेलेका छन् ।