एजेन्सी – क्याटलान क्लब बार्सिलोनाका पुर्व फरवार्ड स्यामुएल इटोलाई २२ महिनाको जेल सजाय सुनाइएको छ ।
कर छली गरेको आरोप स्वीकार गरेपछि उनलेलाई झन्डै २ वर्षको जेल सजायसँगै यस्तै १.५५ मिलियन पाउण्ड जरिवाना तोकेको छ ।

इटोले बार्सिलोनाबाट खेल्दा ३.२ मिलियन पाउण्ड कर छली गरेको स्वीकार गरेका हुन् । कर छलीको आरोपमा स्पेनको सिउडाड डे ला जस्टिसिया अदालतले उनलाई सजाय र जरिवाना तोकेको हो । तर, उनले जेल भने बस्नु पर्ने छैन । स्पेनको कानुन अनुसार हिंसात्मकबाहेकका २ बर्ष भन्दा कम जेल सजायका अभियुक्तले जेलमा बस्नु पर्दैन ।

इटोमाथि २००६ देखि २००९ सम्म तस्विरहरु बिक्री गरेवापत आएको रकममा कर नतिरेको आरोप छ । क्यामरुन फुटसल संघको अध्यक्ष समेत रहेका इटोले आफ्ना पूर्व एजेन्ट जोसे मारिया मेसालेसले गर्दा आफुले उक्त काम गरेको दाबी गरेका छन् ।

चार पटकको वर्ष अफ्रिकन वर्ष खेलाडी ४१ वर्षीय इटो २००४ मा बार्सिलोनामा आबद्ध भएका थिए । इटोले सन् २०१४ मा अन्तराष्ट्रिय फुटबलबाट सन्यास लिएका थिए । इटोले क्यामरुनबाट ११८ क्याप जित्दै ५६ अन्तर्राष्ट्रिय गोल गरेका छन् । उनले क्यामरुनबाट ओलम्पिकमा स्वर्णसँगै अफ्रिका कप अफ नेसन्सको उपाधि जितेका छन् ।

इंग्लिस क्लब चेल्सी र इटालियन क्लब इन्टर मिलानबाट समेत खेलिसकेका इटोले व्यवसायिक खेल करिअरमा ७१८ क्लब खेलमा ३५९ गोल र ११६ एसिस्ट दिएका छन् । चार पटकको वर्ष अफ्रिकन खेलाडी घोषित इटोले ४ च्याम्पियन्स लिग, ३ ला लिगा र १ सिरी ’ए’ उपाधि जितेका छन् ।