काठमाडौं (हाम्रो खेलकुद) – प्रधानमन्त्री शेर बहादुर देउवासँगै पुर्व प्रधानमन्त्री पुष्प कमल दाहाल ‘प्रचण्ड’ ले अखिल नेपाल फुटबल संघ (एन्फा) को नव निर्वाचित कार्यसमितिलाई बधाईं दिएका छन् ।

प्रधानमन्त्री देउवाले बुधबार सरकारी निवास बालुवाटारमा बोलाएर एन्फाको नव निर्वाचित कमिटिलाई बधाई दिएका हुन् । बधाईं कार्यक्रममा प्रधानमन्त्री देउवाले देशमा फुटबल विकासको लासग सरकारले सहयोग गर्ने आश्वासन दिए । प्रधानमन्त्री देउवाले खेलको विकासको लासग मिलेर काम गर्दा सरकार सधैं साथमा रहने थपे ।

यस्तै पूर्व प्रधानमन्त्री प्रचण्डले एन्फाको नव निर्वाचित कार्यसमितिलाई खुमलटारस्थित आफ्नै निवासमा बधाईं दिएका छन् । प्रचण्डले नव निर्वाचित कार्यसमितिलाई बधाईं दिदै फुटबलको विकासको लागि रचनात्मक भुमिका खेल्न पाउँदा खुशी हुने बताएका छन् । ‘तपाईंको कार्यकालमा निर्वाचित सबैलाई हार्दिक शुभकामना र मेरो पूर्ण सहयोगको आश्वासन छ । म पनि खेलको विकासको लागि आफ्नो क्षमताले भएको सक्दो गर्नेछु ।’ प्रचण्डले भने ।

गत ६ असारमा भएको एन्फाको २१औं चुनावी साधरणसभाबाट अध्यक्षमा पंकज विक्रम नेम्वाङ र वरिष्ट उपाध्यक्षमा वीर बहादुर खड्का निर्वाचित भएका थिए । उपाध्यक्षमा दावा लामा, विराटजंग शाही, दीपक खतिवडा र दीर्घ बहादुर केसी (कुमार) निर्वाचित भएका थिए ।

कार्यसमतिको महिला सदस्यमा सरिला श्रेष्ठ र पेमा डोल्मा लामा निर्वाचित भएका छन् । सदस्यमा मनिष जोशी, अनिल मल्ल, रविन्द्र चन्द, विकास नारायण श्रेष्ठ, महेन्द्र क्षेत्री, पुरुषोत्तम थापा, रमेश व्यन्जनकार, मनिराज विष्ट, टीकाराम लामा र भरत बुढ थापा निर्वाचित भएका छन् ।

अब दुई सदस्य निर्वाचित हुन बाँकी छ । सदस्यहरुको चार प्रत्यासीको समान मत पाएपछि बाँकी दुई सदस्यको लागि अर्काे निर्वाचन हुनेछ ।