एजेन्सी – इजिप्टका मोहम्मद सलाहले इंग्लिस क्लब लिभरपुलसँग नयाँ दीर्घकालीन सम्झौतामा हस्ताक्षर गरेर आफ्नो भविष्य बारेको अनुमानको अन्त्य गरेका छन् ।

फरवार्ड मोहम्मद सलाहको लिभरपुलमा सम्झौता एक वर्ष मात्रै बाँकी थियो । उनी २०२२–२३ को सिजनपछि फ्रि एजेन्ट बन्ने थियो । तर, ३० वर्षीय सलाहले एनफिल्डमा आफ्नो बसाई लम्ब्याउन सहमत भएको हो ।

उनले लिभरपुलमा थप ३ वर्षको सम्झौता नविकरण गरेका हुन् । सलाहले एनफिल्डमा ५ वर्षको बसाईमा २५४ खेलमा १५६ गोल गरेका छन् । उनी इटालियन क्लब रोमाबाट लिभरपुल आएका थिए ।

‘मलाई राम्रो लाग्छ र म क्लबसँग ट्रफी जित्न पाउँदा उत्साहित छु । यो सबैका लागि खुसीको दिन हो । हामी सबै कुराको लागि लड्न राम्रो स्थितिमा छौं ।’ सलाहले भने । सलाहले एनफिल्डमा रहँदा च्याम्पियन्स लिग, प्रिमियर लिग, एफए कप, लिग कप, फिफा क्लब विश्वकप र यूईएफए सुपर कप जितेका छन् ।

उनले तीन प्रिमियर लिगसँगै तीन गोल्डेन बुट पनि जितेका छन् । योर्गेन क्लोपको प्रशिक्षणमा उनी दुई पटक पीएफए वर्षको उत्कृष्ट खेलाडी घोषित भएका छन् । आफ्नो सहयात्री साडियो माने जर्मन क्लब बायर्न म्युनिख पुगेपछि सलाहलाई क्लबमै सम्झौता नविकरण गर्न दवाव बढेको थियो । लिभरपुलले मानेको विकल्पमा उरुग्वेली फरवार्ड डाविैन नुनेजलाई पोर्चुगिज क्लब बेन्फिकाबाट ६४ मिलियन पाउन्डमा अनुबन्ध गरिसकेका छन् ।

लिभरपुलले यस सिजन एफए कप र काराबाओ कप जित्यो । सिजनको अन्तिम सातासम्म चार उपाधिको संघारमा रहेको लिभरपुल प्रिमियर लिगमा अन्तिम समयमा म्यानचेस्टर सिटीसँग तथा च्याम्पियन्स लिगको फाइनलमा रियल म्याड्रिडसँग पराजित भयो ।

‘मलाई लाग्छ, नवीकरण गर्न थोरै समय लाग्छ, तर अब सबै कुरा सकिएको छ त्यसैले हामीले अब के हुन्छ भन्नेमा ध्यान केन्द्रित गर्न आवश्यक छ ।’ सलाहले भने, ‘मलाई लाग्छ कि तपाईले पछिल्लो पाँच वा छ वर्षमा टोली सधैं माथि गइरहेको देख्न सक्नुहुन्छ । गत सिजन हामी चार उपाधि जित्ने नजिक थियौं, तर दुर्भाग्यवश सिजनको अन्तिम हप्तामा हामीले दुई ट्रफी गुमायौं । अब हामीसँग नयाँ खेलाडी आएका छन् । राम्रो सोचौं, सबै राम्रो हुनेछ ।