कप्तान रेनुका १२ साता मैदानबाहिर, साफ च्याम्पियनसिप गुमाउने

काठमाडौं (हाम्रो खेलकुद) – नेपाली राष्ट्रिय फुटबल टोली तथा विभागीय नेपाल एपीएफ क्लबकी कप्तान रेनुका नगरकोटे करिव १२ साता मैदान बाहिर रहने भएकी छिन् ।

अनिश्चित रहेको एसियन गेम्सको प्रशिक्षण दौरान रेनुकाले सोमबार चोट बोकेकी थिइन् । सोमबार नै उनको ललितपुरको ग्वार्कोस्थित बि एन्ड बी अस्पतालमा डा. अमित जोशीको टोलीले सोमबार उनको सफल शल्यक्रिया गरेको हो ।

शल्यक्रिया सफल भएको र कुनै समस्या नआएमा रेनुकालाई मैदान फर्कन करिव ३ महिना लाग्ने अस्पतालले जनाएको छ ।
प्रशिक्षण दौरान सरस्वती ऐरको ट्याकलमा पर्दा सन्तुलन गुमाउँदै मैदानमा लडेकी रेनुकाको शरीरको बायाँ भागको क्लाभिकल (कलरबोन अर्थात घाँटीमुनिको हड्डी) फ्याक्चर भएको थियो ।

बुधबार डिस्चार्ज गरिने सम्भावना रहेको अस्पतालले जनाएको छ । १२ साता मैदान बाहिर रहने भएपछि रेनुकाले घरेलु मैदानमा भदौंमा आयोजना हुने भनिएको महिला साफ च्याम्पियनसिप गुमाउने भएकी छिन् । साफ भदौ १३ गतेदेखि २५ गतेसम्म हुने तय भएको छ । मैदान भने तय भइसकेको छैन ।

सन् २०१० देखि महिला राष्ट्रिय टोलीकी नियमित सदस्य रहँदै आएकी रेनुका नियमित कप्तान निरु थापाले सन्न्यासको घोषणा गरेपछि उनी टोलीको कप्तान बनेकी थिइन् ।