एजेन्सी – प्रिमियर लिग च्याम्पियन म्यानचेस्टर सिटीका इंग्लिस फरवार्ड रहिम स्टर्लिङ अर्काे प्रिमियर लिग चेल्सीमा जाने पक्का भएको छ ।

सिटीका २७ वर्षीय फरवार्ड रहिमले चेल्सीसँग व्यक्तिगत सम्झौता गरिसकेको र क्लबले केही दिनमा आधिकारिक रुपमा सार्वजनिक गर्ने बताइएको छ ।

रहिमलाई अनुबन्ध गर्न चेल्सीसँगै युरोपका ठुला बार्सिलोना, रियल म्याड्रिड र बायर्न म्युनिख लगायतका क्लबले चासो देखाएका थिए । यदि यो सम्झौता पुरा भएमा इंग्ल्यान्डका लागि ७७ क्याप जितिसकेका स्टर्लिङ नयाँ मालिक टोड बोहलीको नेतृत्वमा यो समरमा चेल्सीको पहिलो मुख्य सम्झौता हुनेछ ।

चेल्सीले प्रि सिजनका लागि अमेरिका भ्रमणमा जानुअघि नै सम्झौता गरिसक्ने बुझिएको छ । त्यसपछि उनी टोलीसँगै अमेरिका भ्रमणमा सामेल हुनेछन् । सिटीले पनि स्टर्लिङलाई क्लबमै राख्न चाहेपनि स्टर्लिङले नयाँ चुनौती चाहिरहेका छन् । चेल्सीका प्रशिक्षक थोमस टुचेल पनि स्टर्लिङबाट प्रभावित छन् ।

म्यानचेस्टर युनाइटेडका खेलाडीहरुबाहेक जोन टेरी र फर्नान्डिन्होसँगै उनी चार प्रिमियर लिग जित्ने खेलाडी हुन् । तर रहिमले च्याम्पियन्स लिग जित्न सकेका छैन । रोमेलु लुकाकु एक सिजनका लागि लोनमा इन्टर मिलान फर्किएपछि प्रशिक्षक टुचेलले आफ्नो फरवार्ड लाइनलाई बलियो बनाउन चाहिरहेको छ ।

लुकाकुले गत सिजन चेल्सीका लागि सबै प्रतियोगितामा १५ गोल गर्दै सर्वाधिक गोलकर्ता बनेका थिए । काई हाभर्टज (१४) र मेसन माउन्ट (१३) गोल गरेका थिए । पेप ग्वार्डिओला सन् २०१६ मा सिटीको प्रशिक्षक बनेयता, रहिम सिटीको दोस्रो सर्वाधिक गोलकर्ता हुन् । सर्जियो अगुएरोले १२४ गोल गर्दा रहिमले १२० गोल गरेका थिए ।

सिटीले गत सिजन प्रिमियर लिगको उपाधि जित्दा स्टर्लिङले गत प्रिमियर लिगको ३० खेलमा १३ गोल गरेका थिए । सिटीमा सात सिजन बिताउँदा उनले चार प्रिमियर लिगसँगै ९ उपाधि जितेका छन् ।

गत सिजन ज्याक ग्रेलिस र यो सिजन एर्लिङ ब्राउट हालान्ड र जुलियन अल्भारेजलाई अनुबन्ध गरेपछि रहिमले सिटी छोड्ने मनासय बनाएका थिए । च्याम्पियन्स लिगको सेमिफाइनलमा रियल म्याड्रिडसँगको हार र एस्टन भिल्लासँगको फाइनल खेलमा बेञ्चमा रहेका थिए ।

रहिम २०१५ मा प्रिमियर लिग क्लब लिभरपुलबाट ४९ मिलियन पाउन्डमा सिटीमा आबद्ध भएका थिए । सिटीका लागि रहिमले ३३९ खेलमा १३१ गोल गरेका छन् ।