एजेन्सी – इंग्लिस क्लब म्यानचेष्टर युनाइटेडका पोर्चुगिज भेट्रान फरवार्ड क्रिस्टियानो रोनाल्डो प्रि सिजन टुर अन्तर्गत थाइल्याण्ड भ्रमणमा नजाने भएका छन् ।

युनाइटेड छाड्ने चर्चा चलिरहेका बेला उनी पारिवारिक कारण देखाउँदै टोलीसँगको थाइल्यान्ड भ्रमणमा उपस्थित नहुने बताइएको छ । युनाइटेडले पनि उनलाई थप केही समय बिदा दिएको छ ।

युनाइटेड शुक्रबार बैंकक प्रस्थान गर्दैछ । युनाइटेडले रोनाल्डोलाई आफ्नो टोलीको हिस्साको रूपमा हेरिरहेको र उनलाई बेच्न कुनै चासो राखेको छैन । ३७ वर्षीय पोर्चुगिज फरवार्ड रोनाल्डोले क्लबले उपयुक्त प्रस्ताव प्राप्त गरे युनाइटेड छाड्न चाहेको बताएका छन् ।

युनाइटेडले अष्ट्रेलिया जानुअघि मंगलबार थाइल्याण्डमा प्रिमियर लिग प्रतिद्धन्द्धी लिभरपुलसँग खेल्दैछ । रोनाल्डोले प्रि सिजन टुर अन्तरगत नै अष्ट्रेलिया भ्रमणको पनि टुंगो लागेको छैन ।

रोनाल्डो गत सिजन युनाईटेडको सर्वाधिक गोलकर्ता बनेपनि टोली च्याम्पियन्स लिगलाई छनोट हुन सकेन । च्याम्पियन्स लिग खेल्ने योजनामा रहेकाले रोनाल्डोले क्लब छाड्ने मनासय बनाएका हुन् ।

उनी पछिल्लो समय इंग्लिस क्लब चेल्सीसँगै नै जोडिएका छन् । पाँच पटकको बालोन डी’ओर विजेता रोनाल्डोको युनाईटेडसँगको सम्झौता अझै एक वर्ष बाँकी छ ।