काठमाडौं (हाम्रो खेलकुद) – विश्व फुटबलको सर्वोच्च निकाय (फिफा) बाट प्रतिबन्ध फुकुवा भएसँगै पाकिस्तान फुटबल फेडेरेसन (पिएफएफ) ले आफ्नो महिला टोलीलाई नेपालमा हुने साफ च्याम्पियनसिपमा सहभागी गराउने निर्णय गरेको छ ।

योसँगै पाकिस्तानी महिला टोली ८ वर्षपछि पहिलोपटक अन्तर्राष्ट्रिय प्रतियोगिता खेल्न लागेको हो । यससँगै अब ७ राष्ट्रले महिला साफ च्याम्पियनसिपमा सहभागिता जनाउने भएको छ ।

महिला साफ च्याम्पियनसिप आगमी भदौं १३ देखि २५ गतेसम्म नेपालमा हुने तय भइसकेको छ । चोटका कारण नेपाली राष्ट्रिय महिला टोली की कप्तान रेनुका नगरकोटीले भने घरेलु मैदानमा हुने साफ च्याम्पियसिप गुमाउने छिन् ।

तेस्रो पक्षको हस्तक्षेपका कारण पाकिस्तान फुटबल महासंघ (पीएफएफ) लाई सन् २०२१ अप्रिल ५ गते फिफाले निलम्बन गरेको थियो ।

निलम्बनअघि नेपाली महिला राष्ट्रिय टोलीका सदस्य एन्जिला तुम्बापो सुब्बा, अनिता केसी, गीता राना र सरु लिम्बूले पाकिस्तानको राष्ट्रिय महिला फुटबल च्याम्पियनसिप खेलेको थियो । त्यसपछि सबै प्रतियोगिताहरु रद्ध भएको थियो र पाकिस्तान राष्ट्रिय टोली कुनैपनि प्रतियोगितामा सहभागिता जनाउन बाट वञ्चित भयो ।

सन् २०२२ जुलाई १ मा फिफाले पाकिस्तानमाथि लगाएको निलम्बन फुकुवा गरेपछि पाकिस्तानले सबै अन्तर्राष्ट्रिय प्रतियोगितामा सहभागिता जनाउने मौका पाएको हो ।

पाकिस्तानले महिला साफ च्याम्पियनसँगै आफ्नो पुरुष र महिला टोलीसँगै उमेर समूहको टोलीलाई पनि विभिन्न प्रतियोगिताहरुमा सहभागिता गराउने लक्ष्य राखेको छ । निकट भविष्यमै नियमित घरेलु गतिविधि सञ्चालन गरिने पिएफएफले जनाएको छ ।