महिला साफमा नेपाललाई सहज समूह

काठमाडौं (हाम्रो खेलकुद) – नेपालमा अर्को महिना आयोजना हुने महिला साफ च्याम्पियनसिपको समूह विभाजन सार्वजनिक भएको छ । साफले आज एक कार्यक्रममाझ ७ राष्ट्र सम्मिलित प्रतियोगिताको समूह विभाजन गरेको हो ।

छैटौं संस्करणको आयोजक नेपाल रहेको समूह बी मा श्रीलंका र भुटान रहेका छन् । नेपालले हालसम्म साफ च्याम्पियनसिपमा श्रीलंका र भुटानविरुद्ध सबै खेलमा जित हासिल गरेको छ । यस्तै समूह ए मा साविक विजेता भारत, बंगलादेश, माल्दिभ्स र पाकिस्तान रहेका छन् । प्रतियोगिता काठमाडौंस्थित दशरथ रंगशालामा भदौ २१ देखि असोज ३ सम्म हुने कार्यक्रम रहेको छ ।

प्रतियोगिताका लागि नेपालले ५८ सदस्यीय प्रारम्भिक टोली पनि घोषणा गरिसकेको छ । हाल टोलीलाई २९ सदस्यको दुई समूहमा विभाजन गरेर प्रशिक्षण गरिएको छ । केही दिनमा नै अर्को चरणको छनोट हुने बुझिएको छ ।

एन्फाले महिला टोलीको प्रशिक्षकमा कुमार थापालाई नियुक्त गरेको छ । थापा यसअघि सन् २०१५ को साफ च्याम्पियनसिपमा पनि प्रशिक्षक रहेका थिए । विराटनगरमा भएको गत संस्करणको फाइनलमा नेपाल भारतसँग पराजित भएको थियो । हालसम्म ५ संस्करणमध्य नेपाल ४ पटक फाइनलमा भारतसँग पराजित भएको छ । सन् २०१५ मा भने नेपाल भारतसँग सेमिफाइनलमा रोकिएको थियो ।

यो पनि : साफ च्याम्पियनसिपको प्रशिक्षणमा ५८ खेलाडी