एजेन्सी – युरोपेली च्याम्पियन्स लिगको विजेता रियल म्याड्रिडले यस सिजनको यूईएफए सुपर कपको उपाधि जितेको छ । स्पेनिस क्लबले युरोपा लिग विजेता आइनट्राक्ट फ्रान्कफर्टलाई २-० ले पराजित गर्दै सिजनको सुरुवात उपाधिसहित गरेको हो ।

रियल म्याड्रिडका लागि डेविड अलाबा र करीम बेन्जेमाले १-१ गोल गरे । पहिलो हाफमा अलाबाको गोलमा रियलले सुरुवाती अग्रता लिएको थियो । ३७ औं मिनेटमा कर्नरबाट आएको बलमा क्यासेमिरोले गोलरक्षक र डिफेन्डरको गल्तिको फाइदा उठाएका थिए । उनले अलाबालाई हेडरमार्फत पास दिँदै अवसर सिर्जना गरेका थिए । ६ यार्ड बक्सभित्र अनमार्क रहेका अलाबाले सहजै गोल गर्दै अघि बढाए ।

६५ औं मिनेटमा बेन्जेमाले रियलको अग्रता दोब्बर पारे । भिनिसियस जुनियरको पासमा बेन्जेमाले पेनाल्टी क्षेत्र बाहिरबाट गरेको प्रहार गोल भएको थियो । त्यसअघि भिनिसियसको दुई सुन्दर प्रहारलाई गोलरक्षक केभिन ट्राप र डिफेन्डर तुताले बचाएका थिए ।

यससँगै रियल म्याड्रिडले सुपर कप जित्ने सूचीमा बार्सिलोना र एसी मिलानसँग बराबरी गरेको छ । तीन टोलीले समान ५-५ पटक सुपर कप उपाधि जितेका छन् । बार्सिलोना ४ पटक उपविजेता हुँदा रियल ३ र मिलान २ पटक उपविजेता भएको छ । लिभरपुलले ४ पटक उपाधि जितेको छ । रियल यसअघि सन् १९९८, २००० र २०१८ मा सुपर कपमा उपविजेता बनेको थियो ।