एजेन्सी – दक्षिण अमेरिकी राष्ट्र चिलीका कीर्तिमानी गोलकर्ता एलेक्सिस सान्चेज फ्रान्सेली लिग वान क्लब मार्सेमा अनुबन्धित भएका छन् ।

इटालियन क्लब इन्टर मिलानले आपसी समझदारीमा सान्चेजको सम्झौता रद्ध गरेपछि उनी मार्सेमा अनुबन्धित भएका हुन् । मेडिकल र कागजी प्रक्रियापछि सान्चेजले बुधबार मार्सेसँग २ वर्षको सम्झौता गरेका हुन् ।

३३ वर्षीय सान्चेजले एक सिजन लोनसहित इन्टरमा तीन सिजन बिताउँदा १०९ खेलमा २० गोल र तीन उपाधि जितेका छन् । यद्दपि २०२१–२२ को सिजनमा भने सान्चेजले सिमोन इन्जाघीको प्रशिक्षणमा विरलै अवसर पाए । उनले गत सिजन इन्टरबाट सात खेलमा पहिलो रोजाईमा मौका पाउँदा ३९ खेलमा अवसर पाउँदा ९ गोल गर्न सफल रहे ।

सान्चेज २०२०–२१ को सिजनमा इंग्लिस क्लब म्यानचेस्टर युनाइटेडबाट इन्टरमा स्थायी खेलाडीको रुपमा अनुबन्ध भएका थिए । त्यसअघि उनले एक सिजन लोनमा इन्टरमै बिताएका थिए । त्यसयता इन्टरले सिरी ‘ए’सँगै सुपरकोपा इटालिया र कोपा इटालिया जित्दा उनी टोलीका महत्वपूर्ण सदस्य रहेका थिए ।

सान्चेजले आफ्नो इन्स्टाग्राममा इन्टरसँगको आफ्नो समयको प्रतिविम्वित गर्दै क्लब र समर्थकलाई धन्यवाद दिएका छन् । ‘यहाँ मैले ११ वर्षपछि तीनवटा ट्रफी जितेर छोडेको छु । धन्यवाद र शुभकामना, छिट्टै भैटौला ।’ इन्टरले पनि सान्चेजलाई नयाँ गन्तव्यको शुभकामना दिएको छ । आफ्नो करिअरमा १७ उपाधि जितेका सान्चेजले चिलीबाट १४८ क्याप जित्दै ४८ गोल गरेका छन् ।

सान्चेजले चिलियन क्लब कोब्रेलोआबाट व्यवसायिक खेल करिअर शुरुवात गरेका थिए । त्यसपछि सान्चेजले चिलीकै कोलो कोलो, अर्जेन्टिनाको रिभर प्लेट, इटालीको उडिनेस, क्याटलान क्लब बार्सिलोना, इंग्लिस क्लब आर्सनल र म्यानचेस्टर युनाइटेडबाट खेलिसकेका छन् ।