एजेन्सी – इंग्लिस क्लब ब्रेन्टफर्डले डेनिस विंगर मिक्केल डाम्सगार्डलाई इटालियन क्लब साम्पडोरियाबाट क्लबमा अनुबन्ध गरेको छ ।

ब्रेन्टफर्डले डाम्सगार्डलाई ५ वर्षको लागि क्लबमा अनुबन्ध गरेको हो । उनको अनुबन्ध रकम नखुलाइए पनि १५ मिलियन युरोमा आबद्ध भएको बुझिएको छ ।

डाम्सगार्ड जुलाई २०२० मा साम्पडोरियामा अनुबन्ध भएका थिए । त्यसयता उनले ४९ खेलमा दुई गोल गरेका छन् । गत समरमा भएको युरो २०२० को सेमिफाइनलमा २२ वर्षीय डाम्सगार्डले इंग्ल्यान्डविरुद्ध फ्रिकिकमा सनसनी पूर्ण गोल गरेपनि डेनमार्क अतिरिक्त समयमा २–१ ले पराजित भएको थियो ।

ब्रेन्टफर्डका प्रशिक्षक थोमस फ्रान्कले मिकेल ठुलो सम्भावना बोकेको खेलाडी रहेको र उनी क्लबमा फिट हुने बताएका छन् । गत वर्ष चोटका कारण उनी मैदान बाहिर रहे । उनले गत सिजन साम्पडोरियाका लागि ११ खेल मात्रै खेले । बेन मि, आरोन हिकी, केन लुइस पोटर र थोमस स्ट्रकोसापछि उनी यो समरमा ब्रेन्टफर्डमा आबद्ध हुने पाँचौ खेलाडी हुन् ।

ब्रेन्टफर्डले प्रिमियर लिगको आफ्नो पहिलो खेलमा लेस्टर सिटीसँग २–० पछि परेको स्थितिमा २–२ गोलको बराबरी खेल्दै अंकको खाता खोलिसकेका छन् ।

डाम्सगार्डले डेनमार्कका लागि १६ क्याप जित्दा ४ गोल गरेका छन् । डाम्सडार्डले १७ वर्षको उमेरमा एफसी नोर्ड्सल्यान्डबाट डेब्यु गर्दै व्यवसायिक खेल करिअर शुरु गरेका थिए ।