एजेन्सी – फ्रान्सेली फरवार्ड करिम बेन्जेमा स्पेनिस क्लब रियल म्याड्रिडको दोस्रो सर्वाधिक गोलकर्ता बनेका छन् । युइएफए सुपरकप अन्तरगत जर्मन क्लब आइनट्राख्ट फ्रान्कफुर्टमाथि २–० को जित निकालेको खेलमा एक गोल गरेपछि उनी रियलको दोस्रो सर्वाधिक बनेका हुन् ।

रियलको दोस्रो सर्वाधिक गोलकर्ता बन्ने क्रममा हाल रियलको कप्तान रहेका बेन्जेमाले स्पेनिस लेजेन्ड राहुललाई एक गोलले पछि पारेका छन् । राहुलले ७४१ खेलमा ३२३ गोल गर्दा बेन्जेमाले ६०६ खेलमा ३२४ गोल पु¥याएका छन् । ३४ वर्षीय बेन्जेमा सन् २००९ यता रियलमा रहेका छन् । राहुलले १९९४ देखि २०१० सम्म रियलका लागि खेलेका थिए ।

सन् २०१८ मा रोनाल्डोले रियल म्याड्रिड छाडेपछि रियलमा बेन्जेमाले लगातार उच्च प्रदर्शन गर्दै आइरहेको छ । गत सिजन बेन्जेमाले ब्राजिली युवा विंगर भिनिसियस जुनियरसँगको समन्वयमा प्रभाव जमाइरहेको छ ।

रियलको सर्वाधिक गोलकर्ताको सुचीमा पोर्चुगिज भेट्रान फरवार्ड क्रिष्टियानो रोनाल्डो शीर्षस्थानमा रहेका छन् । रोनाल्डोले रियलबाट ४३८ खेलमा ४५० गोल गरेका छन् । रोनाल्डोले २००९ देखि २०१८ सम्म रियलका लागि खेल्दै रियलको सर्वाधिक गोलकर्ता बनेका हुन् ।

बेन्जेमाले गत सिजन नै तेस्रो स्थानमा रहेको अल्फ्रेडो डि स्टेफानोको कीर्तिमान तोडेका थिए । बेन्जेमा रोनाल्डोभन्दा १२४ गोलले पछि रहेको छ ।

बिहीबार राति भएको युइएफए सुपर कपको फाइनलमा रियल म्याड्रिडले फ्रान्कफुर्टलाई २–० ले पराजित गर्दै सिजनको पहिलो उपाधि जितेको छ । रियलको जितमा बेन्जेमासँगै डेभिड अलाबाले गोल गरेका थिए ।

च्याम्पियन्स लिग विजेता र युरोपा लिग विजेताबीच सिजनको सुरुवात हुनुअघि सुपरकपमा खेल्ने प्रावधान छ । रियल च्याम्पियन्स लिग तथा फ्रान्कफुर्ट युरोपा लिगा विजेता हो । गत सिजन रियलले च्याम्पियन्स लिगसँगै ला लिगाको उपाधि जितेको थियो ।