काठमाडौं (हाम्रो खेलकुद)– अखिल नेपाल फुटबल संघ (एन्फा) ले नवीन पाँडेलाई अन्तर्राष्ट्रिय सम्बन्ध प्रमुखबाट बर्खास्त गरेको छ । पहिलो बैठकबाट सर्वसम्मन अन्तर्राष्ट्रिय सम्बन्ध प्रमुखमा नियुक्त भएका पाँडैलाई एन्फाको दोस्रो बैठकले नै बुधबार बर्खास्त गरेको छ ।

एन्फा मुख्यालयमा बुधबार बसकेको कार्यसमितिको बैठकले पाँडेलाई अन्तर्राष्ट्रिय सम्बन्ध प्रमुखबाट हटाएर एन्फा अध्यक्ष पंकजविक्रम नेम्वाङको सल्लाहकार मनोनयन गर्ने निर्णय गरेको एक पदाधिकारीले जानकारी दिएका छन् । असार ६ गतेको निर्वाचित कार्यसमितिको पहिलो बैठकले पाँडेसँगै किरण राईलाई महासचिव र रविन्द्र जोशीलाई कोषाध्यक्षमा नियुक्त गरेको थियो ।

आफैले गरेको निर्णयपछि एन्फा कार्यसमितिका पदाधिकारी एवंम् सदस्यहरु पाँडेको विषयमा अलग अलग समूहमा बाडिएका थिए । साउन ५ गतेका लागि डाकिएको बैठक स्थगित हुनुमा पाँडेको विषय एउटा कारण थियो । बैठक स्थगित भएपछि वरिष्ठ उपाध्यक्ष वीरबहादुर खड्कासहित १२ जनाले पाँडेलाई बर्खास्त गर्न माग गर्दै निवेदन दर्ता गराएका थिए ।

पछि अर्को सदस्य रमेश बञ्जनकारपछि थपिएपछि पाँडेलाई हटाउन चाहनेको संख्या १३ पुगेको थियो । १९ सदस्यीय वर्तमान कार्यसमितिमा १३ जना पाँडेलाई बर्खास्त गर्नुपर्ने अडानमा उभिएपछि अध्यक्ष नेम्बाङ आफ्ना विश्वासपात्रलाई हटाउन राजी भएका छन् ।