एजेन्सी – म्यानचेस्टर युनाइटेडका प्रशिक्षक एरिक टेन हागले क्लबका खेलाडीलाई आइतबार बिदाको दिन काटेर प्रशिक्षणमा निकै पेलाएका छन् ।

यसै सिजनको सुरुवातमा क्लबमा आबद्ध भएका आयाक्सका पूर्व प्रशिक्षक टेन हाग हाल निकै दबाबमा छन् । लगातार दुई हारबाट प्रिमियर लिगमा सुरुवात गरेपछि टोली अहिले अंक तालिकाको पुछारमा छ । पहिलो खेलमा ब्राइटनसँग २-१ को हार बेहोरेको टोली दोस्रो खेलमा ब्रेन्टफर्डसँग ४-० ले पराजित भएको थियो । शनिबार लज्जास्पद हार बेहोरेपछि टेन हागले आइतबार विश्राम काटेर प्रशिक्षण गराएका थिए ।

बेलायती संचारमाध्यमका अनुसार टेन हागले खेलको भोलिपल्ट नै खेलाडीलाई निकै कठिन प्रशिक्षण सेसन लिएका थिए । उनले सबै खेलाडीलाई झन्डै १४ किलोमिटर कुदाएका थिए । शनिबारको खेलमा ब्रेन्टफर्डका खेलाडी युनाइटेड भन्दा १३.८ किलोमिटर बढी कुदेका थिए । उक्त खेलपछि नै टेन हागले आफ्नो टोलीको प्रदर्शनमा असन्तुष्टि जनाएका थिए ।

‘ब्रेन्टफर्डमा बढी भोक देखिएको थियो । हामीले व्यक्तिगत गल्तीका कारण नै गोल खान पुग्यौं । रणनीति बनाएपछि त्यसलाई प्रयोग नगर्नु राम्रो होइन,’ उनले भने, ‘खेलाडीले मैदानभित्र जिम्मेवारी लिएनन् । आफूमा विश्वास गरेर खेल भन्दा त्यो हुन सकेन ।’

युनाइटेडले प्रिमियर लिगमा अब लिभरपुलको सामना गर्दैछ । उक्त खेलका लागि समर्थकहरुले युनाइटेडका मालिक ग्लेजर परिवारविरुद्ध आन्दोलनको कार्यक्रम राखेका छन् ।