एजेन्सी – अर्जेन्टिनी विंगर एन्जल डि मारियाले एक गोलसँगै एक असिस्ट दिएपछि युभेन्ट्सले नयाँ सिजनको इटालियन सिरी ‘ए’ मा सानदार सुरुवात गरेको छ ।

घरेलु मैदानमा सस्सुलोलाई ३–० ले पराजित गर्दै युभेन्ट्सले सुखद् सुरुवात गरेको हो । घरेलु मैदानमा युभेन्ट्सको सहज जितमा डुसान भ्लाहोभिचले दुई तथा एन्जल डि मारियाले गोल गरे ।

एलिएन्ज स्टेडियम टोरिनोमा सोमबार राति भएको खेलको २६औं मिनेटमा डि मारियाको गोलबाट युभेन्ट्सले सुरुवाती अग्रता लिन सफल भएको थियो । डि मारियाले युभेन्ट्सका लागि सिरी ‘ए’ को डेब्यु खेलमै एलेक्स सान्द्रोको पासमा गोल गर्न सफल भएका थिए ।

४३औं मिनेटमा भ्लाहोभिचले पेनाल्टीमा गोल गर्दै युभेन्ट्सको अग्रता दोब्बर पारे । पेनाल्टी बक्समा जियान मार्काे फेररारीले भ्लाहोभिचलाई नै फउल गरेपछि रेफ्रीले भिएआरको सहायता लिदै युभेन्ट्सलाई पेनाल्टी प्रदान गर्दा उनी चुकेनन् ।

५१औं मिनेटमा भ्लाहोभिचले गोल गर्दै युभेन्ट्सलाई ३–० ले अघि बढाए । भ्लाहोभिचले यसपटक डि मारियाको पासमा गोल गर्न सफल भएका थिए । त्यसपछि थप गोल निस्कन नसक्दा युभेन्ट्स विजयी हुन सफल रह्यो ।

यो जितसँगै युभेन्ट्सले ३ अंक जोडेको छ । सस्सुलो अंकविहीन छ । सिरी ए कै अर्काे खेलमा नेपोलीले हेलास भेरोनालाई ५–२ ले पराजित गर्दै विजयी सुरुवात गरेको छ ।