एजेन्सी – एट्लेटिको म्याड्रिडले नयाँ सिजनको स्पेनिस ला लिगामा विजयी सुरुवात गरेको छ । गेटाफेलाई उसकै मैदानमा ३–० ले पराजित गर्दै एट्लेटिकोले विजयी सुरुवात गरेको हो ।

एट्लेटिकोको जितमामा अल्भारो मोराटाले दुई तथा एन्टोइन ग्रिजमनले एक गोल गरे । पोर्चुगिज मिडफिल्डर जोआओ फेलिक्सले तीन गोलमै असिस्ट प्रदान गरे ।

कोलिसिअम अलफन्सो पेरेज स्टेडियम गेटाफेमा सोमबार राति भएको खेलमा एट्लेटिकोले १५औं मिनेटमा मोराटाको गोलमा अग्रता लिन सफल भयो । उनले फेलिक्सको पासमा गोल गर्न सफल भए ।

५९औं मिनेटमा मोराटाले फेलिक्सकै पासमा व्यक्तिगत र टोलीका लागि दोस्रो गोल गर्दै अग्रता दोब्बर पारे । ७५औं मिनेटमा फेलिक्सकै पासमा परिवर्तित खेलाडी एन्टोइन ग्रिजमनले गोल गर्दै टोलीको जित पक्का गरे ।

ग्रिजमन ६२औं थोमस लेमारको स्थानमा मैदानमा छिरेका थिए । त्यसपछि थप गोल निस्कन नसक्दा एट्लेटिको विजयी हुन सफल भयो ।

जितसँगै एट्लेटिको ३ अंक जोडेर शीर्षस्थानमा उक्लिएको छ । रियल बेटिस, भिल्लारियल, ओसासुना, रियल म्याड्रिड, रियल सोसिडाड र भ्यालेन्सियाको समान ३ अंक रहेपनि एट्लेटिको गोल अन्तरमा माथि छ । पराजित गेटाफेले अंकको खाता खोल्न सकेको छैन ।

ला लिगाकै अर्काे खेलमा एथलेटिको बिल्वाओ र मलोर्काले गोलरहित बराबरी खेल्दा रियल बेटिसले इल्चेलाई ३–० ले पराजित गरेको छ ।