एजेन्सी – इटालियन सिरी ‘ए’ मा साविक विजेता एसी मिलान बराबरीमा रोकिदा उपविजेता इन्टर मिलानले सहज जित हात पारेको छ ।

एसी मिलान घरेलु टोली सस्सुलोसँग गोलरहित बराबरीमा रोकिएको हो । खेलको २३औं मिनेटमा सस्सुलोले पेनाल्टीको अवसर खेर फालेको थियो ।

खेल अवधिभर घरेलु टोलीलाई दवावमा राखेपनि मिलानले गोल गर्न नसक्दा बराबरीमा रोकिन बाध्य बन्यो । यो बराबरीसँगै मिलान ४ खेलबाट ८ अंक जोडेर तेस्रो स्थानमा रहेको छ । सस्सुलो ५ अंक जोडेर १०औं स्थानमा छ ।

सिरी ‘ए’ कै अर्काे खेलमा इन्टर मिलानले क्रेमोनेसेलाई ३–१ ले पराजित गरेको छ । घरेलु टोली इन्टरको जितमा जोआक्विन कोरेआ, निकोलो बरेल्ला र लोउटारो मार्टिनेजले गोल गरे । क्रेमोनेसेका डेभिड ओकिरेकीले एक गोल फर्काए ।

मिलानोमा मंगलबार राति भएको खेलको १२औं मिनेटमा जोआक्विन कोरेआल गोल गर्दै इन्टरलाई अग्रता दिलाए । ३८औं मिनेटमा निकोलो बरेल्लाले गोल गर्दै इन्टरको अग्रता दोब्बर पारे ।

७६औं मिनेटमा लोउटारो मार्टिनेजले गोल गर्दै इन्टरलाई ३–० ले अघि बढाए । अन्तिम समयमा क्रेमोनेसेका डेभिड ओकिरेकीले एक गोल गर्दै खेललाई ३–१ को स्थितिमा ल्याएपनि टोलीको हार टार्न सकेन ।

यो जितसँगै इन्टर ४ खेलबाट ९ अंक जोडेर दोस्रो स्थानमा उक्लिएको छ । पराजित क्रेमोनेसे अंकविहीन हुँदै १९औं स्थानमा छ । रोमा १० अंक जोडेर शीर्षस्थानमा छ ।