म्युनिख (एजेन्सी)– निकटमत प्रतिद्वन्द्वि आरबी लिपजिङलाई ३–० ले हराउँदै बायर्न म्युनिखले जर्मन बुन्डेसलिगामा ३ अंकको अग्रता लिएको छ । १० खेलाडीमा सिमित हुँदै खेलको अन्त्य गरेका लिपजिङलाई हारएपछि क्रिसमसअघि बायर्न शीर्षस्थानमा यथावत रहेको छ ।

समान ३६ अंक मा रहेको अवस्थामा बायर्न र लिपजिङबीच पहिलो पटक प्रतिस्पर्धात्मक खेलमा भेट भएको थियो । थियागो अल्कान्टारा र जावी अलन्सोले गोल गरेपछि बायर्नले पहिलो हाफमै २ गोलको अग्रता लिएको थियो । लिपजिङ पहिलो हाफमै १० खेलाडीमा सिमित भएको थियो । फिलिप ल्हामलाई फाउल हानेपछि इमिल फोर्सबेर्गले ३० औं मिनेट रातो कार्ड पाउँदै मैदान छोडेका थिए ।

दोस्रो हाफमा रोर्बेटो लेवान्डवस्कीले पेनाल्टीमा गोल गरेपछि बढुवा भएकै बर्ष उच्च प्रदर्शन गर्दै आएको लिपजिङ एक महिना लामो ब्रेकमा जानुअघि साविक विजेतासँग पराजित भएको छ । जारी सिजनमा लेवान्डोवस्कीको त्यो १२ औं लिग गोल थियो ।

१६ खेलपछि बायर्नको ३९, लिपजिङको ३६ अंक छ । तेस्रो स्थानको हेराथ बर्लिनको ३० अंक छ । हेराथले ड्राम्साड्टलाई २–० ले हराएको थियो । त्यस्तै फ्राइबर्गले इन्गोलस्डाटलाई २–१ ले पराजित गर्यो । एफसी कोलोग्ने र बायर लेभरकुसन तथा होफिनहिम र वेडर ब्रेमनबीचको खेल १ –१ को बराबरीमा टुंगिएको थियो ।