काठमाडौं (हाम्रो खेलकुद)– पहिलो एतिहासिक जितसँगै भुटान दशरथ रंगशालामा जारी महिला साफ च्याम्पियनसिपको सेमिफाइनलमा पुगेको छ । सन् २०१० बाट सुरु भएको च्याम्पियनपिको आफ्नो १५ औं खेलमा प्राप्त जितले भुटानलाई पहिलो पटक अन्तिम चारको यात्रा तय गराएको छ ।

समूह चरणको आफ्नो अन्तिम खेलमा भुटानले श्रीलंकालाई ५–० को हराउँदै ऐतिहासिक जित निकालेको हो । नेपाल र श्रीलंकाबीच सोमबार हुने खेलमा जुन परिणाम आएपछि भुटान भने सेमिफाइनल पुगेको छ । पहिलो खेलमा नेपालले भुटानलाई ४–० ले हराएको थियो ।

श्रीलंकालाई हराउन सके नेपाल समूह बीको विजेता र भुटान उप विजेता बन्ने छ । श्रीलंकासँग बराबरीमा रोकिएपनि नेपाल समूह विजेता नै बन्ने छ । नेपाल श्रीलंकासँग पराजित भएको अवस्थामा तीनै टोलीको समान ३ अंक हुनेछ । त्यो अवस्थामा प्रतियोगिताको नियमावली अनुसार नेपाल र श्रीलंकामध्ये एक गोलअन्तरका आधारमा अन्तिम चारमा पुग्नेछ ।

भुटानको ऐतिहासिक जित
भुटानलाई ऐतिहासिक जित दिलाउन डेखी लाजोमले २ तथा नामङ्याल डेमा, छिरिङ लादेन, छिरिङ याङ्देनले समान १ गोल गरे । योसँगै टोलीको सेमिफाइनल जाने सम्भावना बढेको छ । साफ च्याम्पियनसिपको पहिलो संस्करणमा श्रीलंकासँग १–१ को बराबरी खेल्नु नै भुटानको यसअघिको सफल नतिजा थियो । शुक्रबारको जित अघि १४ खेलमा १ बराबरी खेलेको भुटानले १३ खेलमा हार बेहोरेको थियो । १४ खेलमा भुटानले ७७ गोल खाँदा ३ गोलमात्र गर्न सकेको थियो ।

नामङ्यालको गोलबाट भुटानले पहिलो हाफमा अग्रता लिएको थियो । ४२ औं मिनेटमा पेनाल्टी बक्सको केहि बाहिर पाएको अवसरमा नामङ्यालले पहिलो बारमा गोल गरेका थिइन् । डेखीले ५० औं मिनेटमा गोल गर्दै अन्तरलाई दोब्बर बनाएकी थिइन् । पेनाल्टी बक्स भित्र गले वाङ्मोको पासमा डेखीले गोल गरेकी हुन् ।

डेखीले ६३ औं मिनेटमा पेनाल्टीमा अर्को गोल गरेकी थिइन् । आफैलाई सेलबाराज युवारानीले पेनाल्टी बक्समा फाउल हानेपछि प्राप्त पेनाल्टीमा डेखीले गोल गरेकी थिइन् । छिरिङले ८४ औं मिनेटमा टोलीका लागि चौथो गोल गरेकी थिइन् । कप्तान गलेको प्रहारलाई श्रीलंकाको गोलकिपर योहानी विरासिङ्गीले रोकेपनि रिबाउन्डमा छिरिङले खाली पोष्टमा गोल गरेकी थिइन् ।

भुटानले ८९ औं मिनेटमा छिरिङ याङदेनले गोल गरिन् । चौथो गोल गरेकी लादेनको प्रहारमा श्रीलंकाका गोलकिपरले रोकेपछि उनीबाट छुटेको बलमा याङ्देनले गोल गरेकी थिइन् । भुटानले अधिकांश समय खेलमा नियन्त्रण राखेको थियो ।

समूह एमा साविक विजेता समेत रहेको भारतले र बंगलादेशले विजयी सुरुवात गरेका छन् । भारतले पाकिस्तानलाई र बंगलादेशले माल्दिभ्सलाई समान ३–० ले हराएको थियो । भारत च्याम्पियनसिपको सबै ५ संस्करणको विजेता हो । नेपालले भने ४ पटक फाइनल खेलेको छ । एक पटक बंगलादेश फाइनल पुगेको थियो ।