काठमाडौं(हाम्रो खेलकुद)– नेपाल ओलम्पिक संग्रहालयले यसै महिना आठौं मिडिया कप फुटबल प्रतियोगिता आयोजना गर्ने भएको छ । दक्षिण एसियाली खेलकुद (साग) खेलकुद सूचना केन्द्रको विस्तार एवंम् सञ्चार संस्थाबीच सम्बन्धलाई थप मजबुत बनाउने उद्देश्यका मिडिया कप दशरथ रंगशालमा पुस २१ गते देखि माघ ५ गते सञ्चालन हुने ओलम्पिक संग्रहालयले प्रेस विज्ञप्तीमार्फत जनाएको छ ।

प्रतियोगितामा अन्नपूर्ण पोष्ट दैनिक, अरनिको टेलिभिजन, एभिन्यूज टेलिभिजन, इमेज च्यानल, कान्तिपुर दैनिक, कान्तिपुर टेलिभिजन, कारोबार दैनिक, नेपाल टेलिभिजन र रेडियो नेपालको सहभागिता रहने बताइएको छ ।

मिडिया कपको विजेता टोलीले उपाधिसहित ५० हजार र दोस्रो हुने टोलीले २५ हजार रुपैयाँ पाउनेछन् । त्यस्तै विभिन्न विधाका उत्कृष्ट खेलाडीले जनही ५ हजार पाउनेछन् । हरेक खेलमा म्यान अफ दी म्याच चुनिनेछ ।

प्रतियोगितामा उत्कृष्ट प्रदर्शन गर्ने खेलाडीलाई गत बर्ष विनाशकारी भूकम्पमा ज्यान गुमाएका गोरखापत्र दैनिकका खेल पत्रकार तथा मिडिया कपका पूर्व खेलाडी सुमन भोम्जनको सम्झनामा सुमन भोम्जन उत्कृष्ट खेलाडी उपाधि प्रदान गरिने ओलम्पिक संग्रालयले जानकारी दिएको छ ।