एजेन्सी – घरेलु मैदानमा सानदार पूनरागमन जित निकाल्दै रियल म्याड्रिड पुनः स्पेनिस ला लिगाको शीर्षस्थानमा उक्लिएको छ ।

रियलले एक गोलले पछि परेको स्थिति उल्ट्याएर रियल मलोर्कामाथि ४–१ को सानदार जित निकाल्दै ला लिगामा लगातार पाँचौ जित निकाल्न सफल भएको छ । रियलको जितमा फेडे भाल्भेर्डे, भिनिसियस जुनियर, रोड्रिगो र एन्टेनियो रुडिगरले गोल गरे । मलोर्काका भेडाड मुरिक्युको गोल सान्त्वना बन्यो ।

सान्टियागो बर्नबेउमा आइतबार राति भएको खेलको ३५औं मिनेटमा भेडाड मुरिक्युको गोलबाट घरेलु टोली रियल खेलमा पछि परेको थियो । तर, रियल पहिलो हाफमै खेलमा फर्कियो । इन्ज्युरी समयको थप गरिएको दोस्रो मिनेटमा भाल्भेर्डेले ड्यानियल सेवालोसको पासमा गोल गर्दै खेललाई १–१ गोलको बराबरीमा ल्याए ।

७२औं मिनेटमा भिनिसियस जुनियरले गोल गर्दै रियललाई २–१ को अग्रता दिलाए । उनले रोड्रिगोको पासमा गोल गर्न सफल भए । ८९औं मिनेटमा रोड्रिगोले ड्यानी कार्भाजलको पासमा गोल गर्दै रियललाई सहज जिततर्फ अघि बढाए ।

त्यसपछि इन्ज्युरी समयको थप गरिएको तेस्रो मिनेटमा एन्टेनियो रुडिगरले टोनी क्रुसको पासमा गोल गर्दै रियलको फराकिलो पूनरागमन जित पक्का गरे ।

यस जितसँगै रियलले बार्सिलोनालाई पछि पार्दै पुनः शीर्षस्थानमा उक्लन सफल भएको छ । बार्सिलोनाले क्याडिजलाई ४–० ले हराएर शीर्षमा उक्लिएको थियो ।

लगातार पाँचौं जितसँगै रियलको १५ अंक पुगेको छ । दोस्रो स्थानमा झरेको अपराजित नै रहेको बार्सिलोनाको १३ अंक छ । पराजित मलोर्का ५ अंक जोडेर १३औं स्थानमा छ ।